Блинкен «Вагнер» фаолияти БМТнинг Африкадаги миссиясига халақит бераётганини айтди

«Вагнер» хусусий ҳарбий компаниясининг Африкада фаолият юритаётган бўлинмалари БМТ тинчликпарвар кучлари ишига халақит бермоқда. Бу ҳақда АҚШ Давлат котиби Энтони Блинкен Вашингтонда бўлиб ўтган АҚШ-Африка саммити якунлари бўйича матбуот анжуманида айтиб ўтди.

Блинкендан компаниянинг Африкадаги фаолиятига изоҳ бериш сўралди. Бунга жавобан Давлат котиби АҚШ Давлат департаменти гуруҳнинг Марказий Африка республикасидаги фаолиятини текшираётганини айтди.

Блинкен илгари Марказий Африка республикаси, Мозамбик, Мали ва Ливия каби давлатларда «Вагнер» кучлари билан боғлиқ ҳолда юзага келган хавотирларни эсга олди ва гуруҳ жангарилари қитъадаги инсон ҳуқуқлари бузилишига жавобгар эканини таъкидлади.

«Вагнер’ томонидан фойдаланилаётган ресурслар ҳужжатлаштирилган. Биз ‘Вагнерънинг БМТ тинчликпарвар операцияларига халал бериб, тинчликпарвар кучларни хавф остига қўйганини, БМТ ходимларини хавф остига қўйганини кўрдик. Бундай ёмон ишларнинг рўйхати узун», — деди Давлат котиби.

«Вагнер» ўзи қандай гуруҳ?

«Вагнер» гуруҳи биринчи марта Украинада 2014 йилда пайдо бўлган ва Россиянинг Қримни эгаллаб олишида муҳим рол ўйнаган эди. Унга махсус топшириқли бўлинма собиқ жангчиси Дмитрий Валеревич Уткин асос солган деб ҳисобланади, у гуруҳга Гитлернинг севимли композитори Ричард Вагнернинг номини берган.

Кўплаб Ғарб ОАВлари «Вагнер» гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.

Аввалроқ Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел «Вагнер» Марказий Африка республикасидаги инсон ҳуқуқлари бузилишига жавобгар эканини муҳим хавфсизлик масалаларини назорат қилишини таъкидлаган ва буни Малидаги вазият контекстида эслатган эди. Малида йил давомида иккита ҳарбий тўнтариш содир бўлди.

Европа Иттифоқи Ташқи ишлар кенгаши «Вагнер’ гуруҳи Украина, Сурия, Ливия, Марказий Африка республикаси, Судан ва Мозамбикдаги жиддий инсон ҳуқуқлари бузилиши, жумладан қийноқлар ва суддан ташқари, оммавий ёки ўзбошимчалик билан қатл қилиш ва қотиллик учун жавобгар эканлигини таъкидлайди. Кенгаш гуруҳнинг ўзига ва унга алоқадор шахсларга нисбатан санкциялар киритиган.