Франциянинг Ницца шаҳрида 2016 йилда содир этилган теракт иштирокчилари 18 йилга қамалди

Франция махсус суди 2016 йилда Ниццада содир этилган теракт бўйича гумонланувчиларнинг барчасини айбдор деб топди, улар 2 йилдан 18 йилгача қамоқ жазосига ҳукм қилинди.

Теракт 2016 йилнинг июль ойида содир бўлган, ўшанда юк машинасидаги террорчи Ницца қирғоғида Франция миллий байрами шарафига кечки мушакбозликни томоша қилаётган  оломон устига бостириб келган. Ҳодисада 86 киши ҳалок бўлган, 450 дан ортиқ одам жароҳат олган. Ҳужумнинг бевосита ижрочиси — Тунисда туғилган Муҳаммад Лаҳуаеж Буҳлел полиция томонидан воқеа жойида отиб ўлдирилган.

Бу ишда унинг шериги деб ҳисобланган саккиз киши қўлга олинган. Улардан икки нафари терроризмга ёрдам беришда айбдор деб топилди, қолганлари жиноий тил бириктириш ва ноқонуний қурол савдоси моддалари бўйича ҳукм қилинди.

Ҳужум учун жавобгарликни ИШИД ўз зиммасига олганди. Воқеадан сўнг Франция ҳукумати 2015 йил 13 ноябрь куни Парижда юз берган терактлардан кейин мамлакатда жорий этилган фавқулодда ҳолат режимини яна олти ойга узайтирган.

Мавзуга доир: Франциянинг Ницца шаҳрида террорчи одамларга пичоқ билан ҳужум қилди. Уч киши вафот этди