5 декабрь — америкалик аниматор, кино продюсери ва тадбиркор, анимация саноати кашшофининг туғилган куни эди. Шу муносабат билан Elle нашри Диснейнинг асосий қаҳрамонларини, шунингдек, уларнинг пайдо бўлиш тарихини ёдга олади.
Микки Маус
Дунёдаги энг машҳур сичқончанинг яратилиш жараёни қизиқ бўлган. Дисней ўзи ишлаган гаражда доимий равишда тўпланиб турадиган кемирувчилардан жуда қўрққан. Афтидан, хаёли уларда бўлгани учун ҳам янги қаҳрамон қилиб сичқончани танлайди. Микки (биринчи марта Мортимер деб аталган, аммо бу ном карикатурачининг рафиқасига ёқмаган) Диснейни ҳам, ҳамкасбларини ҳам етарлича асабини эговлайди.
Диснейнинг шериги рассом Аб Айверкс Микки Мауснинг аввалига рақобатчилари бўлганини эслайди — мушукча, қурбақа ва кучукча, лекин Уолт сичқончага ёпишиб олади. Студиянинг келажакдаги рамзи аввалига жуда оддий тасвирланган — думалоқ тана, бош ва иккита қулоқли сичқонча. Айтганча, унинг қулоқлари айланмай доимо олдинга қараб турган.
Бошиданоқ ижодкорлар сичқончани оқ аристократ қўлқопларда чизишади. Бунинг ўзига хос сабаби бор эди: улар экранда панжаларни ажратиб кўрсатишга имкон берарди. Микки Диснейнинг севимли қаҳрамони эди — аниматор деярли йигирма йил давомида сичқончага шахсан ўзи овоз беради. Умрининг охирида эса: «Мен кўплаб аёллар билан танишдим. Лекин Микки Маусни ҳаммасидан кўра кўпроқ яхши кўраман», — деб тан олади.
Золушка
Агар Микки Маус Диснейнинг яхши кўрган қаҳрамони бўлса, Золушка аёл қаҳрамонлар орасида унинг севимлиси ҳисобланади. Дисней бу эртакка биринчи марта 1922 йилда қисқа метражли фильм суратга олади. Чорак аср ўтгач, Ингрид Бергманнинг типажига асосланиб, Дисней ўзини тўлиқ метражли картинада синаб кўришга қарор қилади.
У бир вақтлар «Оппоғой» билан бўлганидек, фильмга бор сармоясини тикади, агар Золушка муваффақиятсизликка учраса, Диснейнинг чўнтагида чақаси ҳам қолмасди. Шунинг учун у олдига мақсад қўяди: ҳеч қандай тажриба бўлмайди, томошабин учун максимал аниқлик, бир сўз билан айтганда, ҳаммаси энг яхши схема бўйича бўлиши керак. Олти йиллик иш, 2 миллион доллар, Дисней бошчилигидаги ходимларнинг бутун бўлими – лойиҳанинг муваффақиятини таъминлайди.
Дональд Дак
Бу кулгили ва сурбет ўрдак машҳурлик борасида дўсти Микки Маусдан қолишмайди. Бу, эҳтимол, болалар ёмон одамларни ёқтириши билан боғлиқдир. Дональд 30 йилларнинг ўрталарида пайдо бўлган, уни Диснейнинг ўзи эмас, балки студия рассоми Дик Ланди чизган. Улар ўрдакни актёр Кларенс Нешга ўхшатиб чизишади, аслида у Диснейни бу образни яратишга илҳомлантиради.
Неш бошқа лойиҳанинг кастингида ўрдак овозида шу қадар ўхшатиб қичқирадики, машҳур карикатурачи Микки Мауснинг антиподи қандай бўлиши кераклигини тушунади. Кларенс Неш ўлимигача ярим аср давомида Дональдга овоз бериб, юзга яқин фильмда қатнашади.
Бемби
Агар сиз Disneyнинг энг яхши ижоди «Оппоғой» ёки Микки мультфильмлари деб ўйласангиз, адашасиз. Маълум бўлишича, кўпчилик томошабинлар беозор кийикча учун овоз беришади. Тўғри, ҳар доим ҳам шундай бўлмаган: аввалига фильм машҳурликка эришмаган, фақат омадсизликка учраган. Аста-секин томошабинлар бу ҳақиқий шедевр эканлигини тушунишади. Мультфильм 20 йилларда нашр этилган худди шу номдаги болалар бесцеллери китобига асосланган эди. Унга бўлган ҳуқуқларни фильм суратга олмоқчи бўлган Голливуд студияси сотиб олади. Продюсерлар бу техник жиҳатдан ҳақиқий эмаслигини англаб етгач, муаллифлик ҳуқуқларини Disneyга берадилар.
Оппоғой
Тахминларга кўра, Уолт Disneyга Оппоғой ҳақида мультфильм суратга олиш фикри Париж кинотеатри залида ўтирганида келган. Микки Маус саргузаштларини кўраётган томошабинларга қараб, Disney омма бир нечта мультфильмларни кетма-кет томоша қилишни ёқтиришини ва бундан чарчамаслигини тушунади. Оппоғой қаҳрамон сифатида уни узоқ вақт давомида — 16 ёшидан бошлаб — бўлажак аниматорга ака-ука Гриммлар китоби асосидаги фильмни кўрганидан бери тинчлик бермаётганди. Лойиҳа устида ишлашни бошлаган Disney хавфли ишга аралашаётганини тушунади.
Бадиий метражли мультфильмлар ундан олдин аллақачон яратилган, аммо бундай миқёсда эмас. Disney бу қаҳрамон учун 1 миллион доллар (30 йиллар учун жуда катта маблағ), 3 йиллик умрини, миллионлаб расм чизган деярли 400 нафар ходимнинг ишини сарфлади. Айтганча, бош қаҳрамон прототипи бўлган 17 ёшли раққоса Мержори Белчер ҳали ҳам тирик. Фақат у ҳозир 17 эмас, 95 ёшда.
Винни Пух
Ажабланарлиси шундаки, айиқ боласи машҳур Disney қаҳрамонлари рўйхатига киритилмаган. Балки у мультфильмларда пайдо бўлишидан анча олдин болаларнинг кумири бўлгани учундир? Ёки Уолт Disneyнинг ўзи «Винни Пух» лойиҳаларида муносиб иштирок этишга улгурмагани учунми? Милна китобининг қаҳрамони 60 йилларнинг бошларида, собиқ муаллифлик ҳуқуқи эгасининг беваси ушбу ҳуқуқларни студияга сотганида, студия ижодкорлари қўлига тушади. Дастлаб Винни ҳақида қисқа метражли фильмлар ишланган ва тўлақонли мультфильм дебютдан 15 йил ўтгач пайдо бўлган. Бу картина шедеврга айлана олмади — студия айиқ боласи ва унинг дўстларини қисқа мультфильмларда ишлатиш тўғрироқ деб қарор қилади. Ўшандан бери Пух телевидениега ўтиб, унинг иштирокида бир нечта анимацион сериаллар суратга олинди.
Мавзуга доир:
- «Рататуй», «Бошқотирма», «Коко сири» — болалар қолиб, катталар ҳам севиб томоша қиладиган Pixar мультфильмлари (видео)
- «Фи, Чи, Пи», «Сукунат», «Оролдаги эртак» — қайта-қайта кўришга арзийдиган, кучли сюжетга эга бўлган турк сериаллари
- Севимли фильмларимизнинг турли актёрлар томонидан ижро этилган афсонавий қаҳрамонлари (фото)
Изоҳ (0)