Туркия Россия газини етказиб беришда 25 фоиздан ортиқ чегирмага эришмоқчи. Анқара эртага, 9 декабрь куни Москва билан музокаралар давомида импорт нархларини пасайтириш шартларини муҳокама қилишни режалаштирмоқда. Бу ҳақда Bloomberg туркиялик юқори мартабали амалдорларга таяниб хабар берди.
Агентлик маълумотларига кўра, турк томони чегирма нафақат 2023 йил учун тўловларга, балки 2022 йилда амалга оширилган тўловларга ҳам татбиқ этилишини кутмоқда.
Агар томонлар нархни пасайтириш бўйича келишувга эриша олмасалар, Bloomberg аниқлик киритишича, Анқара Россия газини етказиб бериш учун тўловларни 2024 йилгача кечиктиришга эришмоқчи.
Агентлик маълумотларига кўра, Россия билан келишув 2022 йил бошидан буён 37,8 фоизга тушиб кетган турк лираси учун босимни юмшатиши мумкин.
Бундан ташқари, келишув Туркиянинг амалдаги президенти Ражаб Тоййиб Эрдўғонга 2023 йилги президентлик сайловлари олдидан энергия нархининг ошишидан қочишга ёрдам бериши мумкин.
Туркия Статистика институти (Туркстат) маълумотларига кўра, 2022 йил октябрь ойи натижаларига кўра, Россиядан минерал ёқилғи, хусусан, кўмир, нефть ва табиий газ импорти 25 фоизга камайган.
Аввалроқ Туркия Европани газ билан таъминламоқчилиги ҳақида хабар берилган эди.
Изоҳ (0)