«Telegram Premium’дан фойдаланувчилар сони 1 миллиондан ошди» — Дуров

Павел Дуров Telegram’нинг монетизацияси ва унинг натижаси мессенжерлар жамоаси кутганидан қандай ошиб кетгани ҳақида маълумот берди.

Telegram’да монетизация бошланганига бир йил бўлди, аммо натижалар кутганимиздан ҳам ошиб кетди, — деб ёзади тадбиркор.

Бошқа иловалардан фарқли ўлароқ, унда рекламаларга махфийликни ҳисобга олган ҳолда ёндашилди: шахсий маълумотлардан фойдаланилмади ва тарғиб қилинган хабарлар оммавий каналларда кўрсатилди.

Шунга қарамай, рекламалар бозорни сезиларли даражада ривожлантирди ва Telegram’ни молиявий барқарорлик сари йўлга қўйди.

Атиги 5 ой олдин тақдим этилган Telegram Premium тезда 1 миллиондан ортиқ обуначига эга бўлди ва ижтимоий тармоқларга обуна бўлиш режасининг энг муваффақиятли намуналаридан бирига айланди, — деб ёзади Дуров.

У ҳали ҳам Telegram умумий даромадининг атиги бир қисмини ташкил этса-да, Telegram Premium’дан фойдаланувчилар сони ҳар куни барқарор ўсиб бормоқда ва бир кун келиб реклама билан рақобатлаша оладиган даражага чиқади.

Дуровга кўра, Telegram жамоаси ҳозир устида ишлаётган функциялар 2023 йилда Telegram’нинг кейинги молиявий ўсиши учун пойдевор яратади.

Аввалроқ Telegram’да криптовалюта савдоси ва уларни сақлаш воситалари бўлиши ҳақида хабар берилганди.