АҚШнинг собиқ президенти Дональд Трамп 2020 йилги президентлик сайловларида Байден устидан ғалаба қозонганини даъво қилиб, конституциясини бекор қилишга чақирди. Бу ҳақда CNN хабар берди.
«Бундай турдаги ва миқёсдаги оммавий фирибгарлик барча қоидалар ва моддаларни, ҳатто конституциядагиларни ҳам бекор қилиш имконини беради», — дейди сиёсатчи. Унинг фикрича, Америка асосчилари икки йил аввал президентлик сайловларида юз берган фирибгарликни эътиборсиз қолдиришни хоҳламаган бўларди.
Ўз навбатида, Оқ уй собиқ президентнинг баёнотига муносабат билдирган. Жумладан, президент маъмурияти матбуот котиби Эндрю Бейт Трампнинг сўзларини қоралашга чақирган.
«Сиз фақат ғалаба қозонганингизда Американи сева олмайсиз. АҚШ конституцияси 200 йилдан ортиқ вақт давомида мамлакатимизда эркинлик ва қонун устуворлигини таъминлаган муқаддас ҳужжатдир. Конституция Америка халқини, қайси партиядан бўлишидан қатъи назар бирлаштиради ва сайланган раҳбарлар унга риоя қилишга қасамёд қилади», — дейди у.
Маълумот ўрнида, АҚШда навбатдаги президентлик сайловлари 2024 йил ноябрида бўлиб ўтади. Дональд Трамп 2017 йилнинг 20 январидан 2021 йилнинг 20 январигача АҚШнинг 45-президенти бўлган.
Трамп 2024 йилги президентлик сайловларида ғалаба қозонса, мамлакатдаги сайлов тизимини ўзгартиришга ваъда берган.
Изоҳ (0)