Shvetsiyaning yangi bosh vaziri Ulf Kristersson NATOga kirish uchun Turkiyaning roziligini ta’minlash maqsadida Shvetsiya hukumati kurd tashkilotlaridan uzoqlashishi kerakligini aytdi.
Hukumat rahbari Kurdiston ishchilar partiyasiga aloqador YPG kurd jangari tashkiloti va uning siyosiy qanoti PYD bilan hamkorlikni to‘xtatish zarurligini ta’kidladi.
Shvetsiyaning yangi tashqi ishlar vaziri Tobias Billstrom ham Xuddi shunday bayonot bilan chiqdi. Uning fikricha, bu qadam Turkiya bilan munosabatlarni yaxshilaydi.
“Mamlakatining asosiy maqsadi — NATOga a’zo bo‘lish”, — dedi u.
Suriya kurdlarining YPG jangarilari va uning siyosiy bo‘limi PYD Turkiyada 1980-yilda Turkiyaga qarshi qo‘zg‘olon boshlagan Kurdiston Ishchilar partiyasining davomchisi deb bilinadi hamda Turkiya, AQSH va Yevropa Ittifoqi tomonidan terrorchi sifatida ko‘riladi.
Turkiya agar Shvetsiya kurdlarni qo‘llab-quvvatlashni to‘xtatmasa, uning NATOga kirishiga to‘sqinlik qilishga va’da bergan.
Turkiya Finlyandiya va Shvetsiyani terrorchi guruhlarni yashirganlikda aybladi, prezident Rajab Toyyib Erdo‘g‘on esa ulardan NATOga a’zolik tashabbuslarini qo‘llab-quvvatlash evaziga gumondorlarni Anqaraga ekstraditsiya qilishni talab qildi.
28-iyun kuni Finlyandiya, Shvetsiya va Turkiya tashqi ishlar vazirlari Anqaraning ikki Skandinaviya davlatining NATOga a’zo bo‘lishini qo‘llab-quvvatlashi to‘g‘risidagi uch tomonlama memorandumni imzoladi.
28-iyun kuni Madriddagi NATO sammitida alyans Shvetsiya va Finlyandiyani unga a’zo bo‘lishga taklif qildi. Nizomga ko‘ra, taklif NATOga a’zo 30 ta davlatda, jumladan Turkiyada ham parlament tomonidan ratifikatsiya qilinishi kerak.
1-noyabr kuni Finlyandiya bosh vaziri Sanna Marin Vengriya va Turkiyani mamlakati va qo‘shni Shvetsiyaning NATOga a’zo bo‘lish haqidagi arizalarini ma’qullashga chaqirdi.
Izoh (0)