Қозоғистон Украинадаги урушни тўхтатишга чақирди
Қозоғистон ташқи ишлар вазири Мухтор Тлеуберди Россиянинг Украинага қарши урушини тўхтатишга чақирди. Бу ҳақда «Орда.кз» хабар берди.
Сиёсатчи 1 декабрь Польшанинг Лодз шаҳрида бўлиб ўтган Европада хавфсизлик ва ҳамкорлик ташкилотининг (ЕХҲТ) Вазирлар кенгашининг 29-йиғилишида бу бўйича гапирган.
«Россия ва Украина ўртасидаги ҳалокатли ҳарбий можарога барҳам бериш учун, биринчи навбатда, сиёсий иродага муҳтожмиз. Бу муаммолар ёлғиз ҳал қилиниши учун катталик қилади. Барча иштирокчи давлатлар бирдам бўлиб, ЕХҲТ қадриятларига қатъий содиқликларини намойиш этиши керак», — дейди Қозоғистон расмийси.
Эслатиб ўтамиз,Россия ташқи ишлар вазири Сергей Лавровнинг Польшада бўлиб ўтадиган ЕХҲТ йиғилишига қатаншиши бекор қилинган. Польша тадбирда Европа Иттифоқи санкциясига киритилган амалдорлар иштирок эта олмаслигини маълум қилган. Сергей Лавров Россиянинг Украинага қилган ҳужуми ортидан февралда санкциялар рўйхатига киритилган. Россия ташқи ишлар вазирлиги бунга муносабат билдириб, мазкур қарорни «қабул қилиб бўлмайдиган ҳужум» деб атаган. ТИВ бу Польшанинг 2022 йилдаги ЕХҲТга раис давлат мақомига мос келмаслигини қайд этган.
