Нарх чегарасини жорий этиш муҳокамалари сабаб Европада газ нархи кўтарилмоқда

Европада шамол турбиналари орқали электр энергияси ишлаб чиқариш икки бараварга камайди. Натижада газнинг спот нархлари ошди. Бу ҳақда «Коммерсантъ» хабар берди.

Европада газ нархи 14 октябрдан бери биринчи марта минг куб метр учун 1,5 минг долларга кўтарилди, — дея хабар бермоқда London ICE биржаси.

Нидерландиядаги ТТФ марказида январь фьючерсларининг нархи 2,5 фоизга ошиб, минг куб метр учун 1 500,9 долларни ташкил қилди.

Шунингдек, Европа давлатлари томонидан нарх чегарасини жорий этиш ташаббуси муҳокама қилиниши фонида газ нархи кўтарила бошлади.

22 ноябрь куни Европа Комиссияси табиий газ нархини ТТФ ҳуб индекси асосида 1 МВт/соат учун 275 еврога чеклашни таклиф қилди. Минг куб метр газ нархи тахминан 3 минг долларни ташкил этади.

Россиянинг Украинага кенг кўламли бостириб кириши фонида Европа Россиядан суюлтирилган газ (LNG) импортини ўтган йилнинг шу даврига нисбатан 42 фоизга оширди.

Financial Times маълумотларига кўра, 2022 йилда Россиядан олиб келинган LNG ушбу ёқилғининг Европа денгиз импортининг 16 фоизини ташкил қилади. Хом ашёнинг деярли ҳаммаси Франция, Бельгия, Испания ва Голландияга етказилган.

Биринчи ўринни 42 фоизлик улуш билан АҚШ, учинчи ўринни 13,7 фоиз билан Қатар эгаллаган.

Умумий ҳажми 17,8 миллиард кубометр бўлиб, ҳозиргача қувурлар орқали етказилган 62,1 миллиард куб метр газнинг кичик бир қисмини ташкил этади.

Refinitiv таҳлилчиларига кўра, йил бошидан буён Европа рекорд даражадаги 111 миллиард куб метр LNG импорт қилди, бу ўтган йилга нисбатан қарийб 70 фоизга кўпдир.