Россиянинг асосий нефти Urals’нинг нархи яна пасайди ва Европа Иттифоқи дипломатлари мамлакат экспортини чеклаш учун таклиф қилаётган юқори нарх чегарасидан ҳам тушиб кетди. Бу ҳақда Bloomberg хабар берди.
Болтиқ денгизидаги Приморск портида мамлакатнинг асосий Urals нефть нархи бир баррель учун 51,96 долларга тушди.
Ўтган ҳафта охирида Европа Иттифоқи дипломатлари Россия нефтининг бир баррели учун 65 дан 70 долларгача бўлган нарх чегарасини муҳокама қилаётган эди. Музокаралар душанба, 5 декабрь куни давом этиши мумкин.
Чеклов кучга кирганидан сўнг, ундан кўпроқ пул тўлаган ҳар қандай харидор давлатга Европа кемалари ёки саноат стандартидаги Европа суғуртасидан фойдаланишга рухсат берилмайди.
Муаммо шундаки, Европа Иттифоқининг баъзи давлатлари, шу жумладан Польша, Россияни Украинадаги уруши учун жазолаш мақсадида 65-70 доллардан пастроқ чегарани талаб қилмоқда.
Бундан фарқли ўлароқ, дунёдаги энг йирик нефть танкерига эга бўлган Греция таклиф этилган нархдан кўра юқорироқ чегара қўйишни афзал кўради.
Дипломатлар якдилликда қарор қабул қилиши ва бунга саноати ривожланган G7 давлатлари ҳам розилик билдириши зарур.
Юқори нарх чегараси қанчалик баланд бўлса, Россия ва унинг мижозлари учун саноат стандарти суғуртаси билан танкерларни ижарага олиш осонроқ бўлади.
Россия нефтининг нархи бўйича сезиларли ноаниқлик мавжуд, чунки урушдан бери мамлакат юклари савдосининг шаффофлиги нисбатан пасайди.
Аввалроқ Россия нефти нархининг чекланиши мамлакат даромадларини камайтирмаслиги ҳақида хабар берилганди.
Изоҳ (0)