Путин Тўқаевдан Макронга мактуб бериб юборганини Кремль рад этди

Россия президенти Владимир Путин Қозоғистон президенти Қосим-Жўмарт Тўқаев билан суҳбат чоғида ундан Франция раҳбари Эммануэль Макронга ҳеч қандай хабар етказишни сўрамаган. Бу ҳақда Россия президенти матбуот котиби Дмитрий Песков маълум қилди, деб ёзади «Коммерсантъ».

«Владимир Путин Тўқаев орқали Эммануэль Макронга қандайдир хат-хабар жўнатдими?» — деган саволга Дмитрий Песков: «Йўқ», — деб жавоб берди.

Россия ва Қозоғистон президентлари 28 ноябрь куни Москвада учрашди. 23 ноябрь куни Эммануэль Макрон яқин кунларда Владимир Путин билан бевосита мулоқот қилишини айтганди.

Кремль сайтидаги маълумотларга кўра, Путин ва Макрон сўнгги марта 11 сентябрь куни мулоқот қилган, у августдаги суҳбатдан кейинги биринчиси бўлган. Ўшанда Франция президенти Россия раҳбаридан яна Украинадаги жанговар ҳаракатларни тўхтатишни сўраган. Шундан кейин Песков Путин Макрон билан бошқа гаплашмаётганини, чунки у Россиянинг позициясига қулоқ тутмаганини айтганди.

Қозоғистон президенти Қосим-Жўмарт Тўқаев айни пайтда расмий ташриф билан Францияда бўлиб турибди. У Москвада Путин билан музокаралар ўтказганидан кейин дарҳол Парижга учиб кетганди.