Лукашенко Беларусь ташқи ишлар вазири Макей билан видолашув маросимида иштирок этди (фото)

Беларусь президенти Александр Лукашенко яқинда вафот этган ташқи ишлар вазири Владимир Макейни сўнгги манзилга кузатиш маросимида иштирок этди, деб хабар бермоқда БелТА ахборот агентлиги.

Видолашув маросими Минскдаги Марказий офицерлар уйида бўлиб ўтмоқда. Макей билан хайрлашиш учун Лукашенкодан ташқари вазирнинг оила аъзолари, ТИВ ходимлари, юқори лавозимли амалдорлар, вазирлик, идора ва давлат органлари раҳбарлари ва яна кўплаб одамлар келган. Маросимдан кейин Макей Минскдаги Шарқий қабристонга дафн этилади.

Макей 26 ноябрь куни 64 ёшида вафот этди. Вазирнинг ўлими ҳақида эълон қилган Беларусь Ташқи ишлар вазирлиги матбуот котиби Анатолий Глаз ўлим сабабларини маълум қилмади. Кейинроқ ОАВ унинг ўлимига юрак хуружи сабаб бўлгани ҳақида маълумот эълон қилди.

Лукашенко Макейнинг яқинларига ҳамдардлик изҳор қилди. Ўзбекистон ТИВ ҳам Владимир Макей вафоти муносабати билан Беларусга ҳамдардлик билдирди ҳамда дипломат сўнгги йилларда Ўзбекистон ва Беларусь ўртасидаги дўстона алоқаларни мустаҳкамлашга катта ҳисса қўшганини қайд этди.

Макей 2012 йил 20 августдан буён Беларусь ташқи ишлар вазири лавозимида ишлаб келаётган эди. 1993 йилдан бери Макей Беларусь Ташқи ишлар вазирлигида турли лавозимларда ишлаган, жумладан Давлат протокол хизмати раҳбарининг ўринбосари, мамлакатнинг Европа Кенгашидаги вакили бўлган. У 2000—2008 йилларда Лукашенконинг ёрдамчиси, 2008—2012 йилларда эса унинг маъмурияти раҳбари бўлиб ишлаган.

Владимир Макей ШҲТ саммити доирасида Ўзбекистонга ҳам келган ва 14 сентябрь куни Владимир Норов билан учрашган эди.