Американинг Merriam-Webster изоҳли луғати «gaslighting» («газлайтинг») сўзини 2022 йил сўзи деб эълон қилди.
Ушбу сўзнинг Уэбстер луғатидаги тўлиқ таърифи қуйидагича:
одатда узоқ вақт давомида одам томонидан руҳий манипуляция қилиниб, қурбоннинг ўз фикрлари тўғрилигига, воқеликни қабул қилишига ёки хотираларига нисбатан шубҳа пайдо бўлишига олиб келадиган ҳамда одатда онг чалкашлиги, ўзига ишонч ва қадр-қиммат ҳисси йўқолиши, эмоционал ёки руҳий барқарорлигига амин бўлмаслик, шунингдек, манипуляция қилувчи одамга боғлиқ бўлиб қолишни келтириб чиқарадиган ҳолатдир.Луғат муаллифлари қайд этишича, сўнгги йилларда, айниқса ўз манфаати йўлида, кимнидир янглиштириш, чалғитиш билан боғлиқ ҳар қандай амалиёт «газлайтинг» сўзи билан ифодаланмоқда.
Нашриёт маълумотларига кўра, ушбу сўзнинг маъноси ҳақидаги сўровлар 2022 йилда 2021 йилга нисбатан 1740 фоизга ўсган — юқори қизиқиш даражаси бутун йил бўйи кузатилган.
«Бизнинг ҳозирги дезинформация асримизда, яъни сохта янгиликлар, фитна назариялари, Twitter’даги троллар ва дипфейклар даврида ‘газлайтин’ замонамиз сўзига айланиб қолди», — дея луғат муаллифлари ўз танловини изоҳлади.
2021 йилда Merriam-Webster йил сўзи сифатида «вакцина»ни танлаган эди.
Оксфорд луғати ҳам ўз талқини бўйича йил сўзини эълон қилиши кутилмоқда. У йил сўзини биринчи марта жамоатчилик орасида овозга қўйиш йўли билан учта сўз ичидан танлаб олади. Шорт-листга metaverse («метаолам») ва goblin mode («гоблин режими») тушунчалари ҳамда #IStandWith («мен қўллаб-қувватлайман») хештеги кирди.
1 ноябрь куни Британиянинг Collins English Dictionary инглиз тили луғати permacrisis сўзини жорий йил сўзи деб эълон қилган эди. У permanent (доимий) ва crisis (инқироз) сўзларидан ҳосил бўлган бўлиб, «беқарорлик ва таҳликалиликнинг узоқ даври» деган маънони билдиради.
Изоҳ (0)