Тўқаев Путиннинг таклифи билан Москвага борди

Қозоғистон президенти Қосим-Жўмарт Тўқаев Россия президенти Владимир Путиннинг таклифи билан 27 ноябрь куни кечқурун расмий ташриф билан Москвага борди, деб ёзади Tengrinews.

Қайд этилишича, бугун, 28 ноябрь куни Москвада давлат раҳбарлари музокаралар ўтказади. Бундан ташқари, икки мамлакат етакчилари видеоконференцалоқа режимида Қозоғистон ва Россия минтақалараро ҳамкорлик форумида қатнашади.

Аввалроқ Россия президенти матбуот котиби Дмитрий Песков ташриф чоғида ҳужжатлар имзоланишини айтганди. Айнан қандай ҳужжатлар эканига Песков аниқлик киритмади.

Икки мамлакат етакчиларининг ушбу учрашуви Тўқаев 26 ноябрь куни иккинчи марта Қозоғистон президенти лавозимига киришганидан буён биринчиси бўлади. Путин сайловлардан кейин дарҳол Тўқаевни қайта сайлангани билан табриклаганди.

Бундан аввал Қозоғистон президенти Россияга 18 августда келганди. Ўшанда Путин ва Тўқаев Сочида музокаралар олиб бориб, «Россия ва Қозоғистон ўртасидаги стратегик шериклик ва ҳамкорлик алоқаларини янада ривожлантириш масалаларини», шунингдек, бу йил Қозоғистон раислик қилаётган МДҲ доирасидаги фаолиятни муҳокама қилганди.