Jahon bozorlarida asosiy oziq-ovqatlar narxlari pasayishi kutilmoqda — Markaziy bank

2023-yilda asosiy oziq-ovqat tovarlari bo‘yicha jahon narxlari nisbatan pastroq shakllanishi kutilmoqda. Bu haqda O‘zbekiston Markaziy banki pul-kredit siyosatining kelasi 3 yillik davriga mo‘ljallangan prognozlarida ma’lum qildi.

Qayd etilishicha, jahon bozorlarida asosiy oziq-ovqatlar narxlari bo‘yicha kutilmalar pasayuvchi tendensiya namoyon etmoqda.

2020-yilda o‘zining eng yuqori nuqtasiga chiqqan transport va logistika xizmatlari narxlari bosqichma-bosqich pasayib borishi oqibatida 2023-yilda asosiy oziq-ovqat tovarlari bo‘yicha jahon narxlari nisbatan pastroq shakllanishi kutilmoqda. Birlashgan millatlar tashkilotining oziq-ovqat va qishloq xo‘jaligi mahsulotlari narxlarini o‘zida ifodalovchi FAO indeksi 2023-yilda 120-130 bandgacha pasayishi (joriy yil sentyabr holatiga 137 bandni tashkil qilgan) bo‘yicha prognozlar yuzaga kelgan. Xorijiy markaziy banklar tomonidan ko‘rilayotgan choralar bilan birgalikda asosiy oziq-ovqat narxlarining pasayuvchi trendlari keyingi yilda global inflyatsion jarayonlarning yumshab borishiga hissa qo‘shadi.

Markaziy bankka ko‘ra, O‘zbekistonda kelasi yilda oziq-ovqat mahsulotlari importidagi yuqori ulush saqlanib qolishi kutilmoqda.

Joriy yilda yuzaga kelgan keskin tashqi vaziyat sharoitida O‘zbekiston eksporti tarkibida reeksport operatsiyalari ham o‘rin oldi. Keyingi yilda ushbu tendensiyaning davom etishi ham eksport, ham import hajmlariga ta’sir ko‘rsatuvchi omillardan bo‘ladi. Iqtisodiy faollikning saqlanib qolayotganligi va xususiy sektordagi o‘sish sur’atlarini inobatga olib, 2023-yilda import hajmi 14-15 foiz, 2024-yilda 12-14 foiz va 2025-yilda 8-10 foiz atrofida o‘sib borishi baholanmoqda. Import tarkibida kimyo mahsulotlari, mashina va uskunalar importi va oziq-ovqat mahsulotlari importining nisbatan yuqori ulushlari saqlanib qolishi kutilmoqda.

Avvalroq Xalqaro valyuta jamg‘armasi 2023-yilda O‘zbekistonda iqtisodiy o‘sish sekinlashishi va inflyatsiya pasayishini prognoz qilgandi.