Испания терма жамоаси ярим ҳимоячиси Гави Коста-Рикага қарши баҳсда (7:0) Жаҳон Чемпионатидаги дебютини ўтказди ва гол уришга эришди.
18 ёш-у 110 кунлик Гави йирик мусобақаларда (ЖЧ/Евро) ўйнаган Испания тарихидаги энг ёш футболчига айланди.
Футболчи 74-дақиқада Коста-Рика дарвозасини ишғол қилди. Шу тариқа Гави мундиалда гол урган энг ёш испаниялик ва европалик футболчи бўлди.
Жаҳон Чемпионатлари тарихида фақат икки футболчи Гавидан ёшроқ пайтида гол урган. Рекорд 1958 йил Бразилия сафида гол урган Пелега (17 ёш-у 239 кун) тегишли. Ундан кейинги ўринда 1930 йилда тўп киритган Мексика собиқ футболчиси Мануэль Росас (18 ёш-у 93 кун) жой олган.
Қайд этиш керак, Гави Испания терма жамоаси тарихида энг ёш ўйинчи ва энг ёш гол муаллифи ҳисобланади.
Мавзуга доир: Испания терма жамоаси Жаҳон Чемпионатларидаги энг йирик ҳисобини қайд этди
Изоҳ (0)