«Дарё» нашри 24 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россияда бошқарув йўқолиб, тартибсизлик юзага келиши айтилмоқда
Украинадаги тўққиз ойлик урушдан сўнг мамлакат давлатчилиги ва ўзига хослиги ҳар қачонгидан кучайди. Россия эса, аксинча, чегаралари назоратсиз, хусусий ҳарбий тузилмаларга таянган ва аҳолиси қочқин муваффақиятсиз давлатга айланиб бормоқда — булар мамлакатдаги вазиятни назорат қилиб бўлмайдиган ҳолга солади, деб ёзмоқда The Economist журнали сиёсий мутахассисларга таяниб.
Ғарб етакчиларининг Украина Россия агрессиясига қарши тура олишига ишончи ортди, бироқ айни пайтда Россиянинг урушдан омон қолиши бўйича хавотир кучаймоқда, деб ёзган нашр муҳаррири Аркадий Островский мақолада.
Журналда келтирилган муваффақиятсиз давлатнинг биринчи белгиси — аниқ чегараларнинг йўқлиги. 2022 йилнинг сентябрь ойида Украинанинг тўрт вилояти аннексия қилиниши Россияни чегаралари ноаниқ ва назоратсиз давлатга айлантира бошлади, дейилади мақолада.
Сиёсатшунос Екатерина Шулман вазиятга шунда изоҳ беради. «Билишимизча, Россия Федерацияси ўзини ўзи йўқ қилмоқда ва муваффақиятсиз давлат босқичига ўтмоқда». Сиёсатшунос, шунингдек, Украина вилоятларининг аннексия қилиниши мамлакат ичидаги «муаммоли ҳудудлар», жумладан, Шимолий Кавказ республикаларига қўл келиши мумкинлигини айтди, деб ёзади газета.
The Economist нашрининг ёзишича, муваффақиятсиз давлатга хос яна бир белги — жисмоний кучлар устидан давлат монополиясининг йўқолиши ва сафарбарликка чақирув. «Вагнер» хусусий ҳарбий компанияси ва Чеченистон раҳбари Рамзан Қодиров назорати остидаги кучларнинг ҳаракатлари шундан далолат беради. Журналнинг таъкидлашича, ҳатто Россия давлат хавфсизлик идоралари ҳам ўз манфаатлари учун ишламоқда.
Бундан ташқари, Кремль энди мамлакат аҳолиси хавфсизлигининг кафолати бўла олмайди, сафарбарлик эълон қилиш орқали ҳатто унинг ўзи асосий хавф манбайига айланмоқда, дейилган The Economist мақоласида.
Зеленский навбатдан ташқари йиғилишда Россиянинг энергетика террорини тўхтатишга чақирди
Украина президенти Владимир Зеленский Бирлашган Миллатлар Ташкилоти Хавфсизлик кенгашининг шошилинч чақирилган навбатдан ташқари йиғилишида Россиянинг энергетика террорини тўхтатишга чақирди ва БМТ экспертларини Украинанинг муҳим инфратузилма объектларини келиб текширишга таклиф қилди. 23 ноябрь куни Украина электр таъминотида катта узилишлар юз бериб, аҳолининг аксарияти электрсиз қолган.
Бундан ташқари, Украина президенти Россияни БМТ Хавфсизлик кенгашида вето ҳуқуқидан маҳрум этишни таклиф қилди.
23 ноябрь куни Россия Киев ва Украинанинг қатор вилоятларига янги ракета зарбаларини берди. Украина Энергетика вазирлиги маълумотларига кўра, ўққа тутилишлар сабаб барча атом электр станциялари ҳамда Украинанинг аксарият иссиқлик электр станциялари ва гидроэлектр станциялари ўчирилган.
Украина президенти офиси раҳбари Андрей Ермак мамлакатда электр таъминотидаги узилишлар бир неча ҳафта давом этиши мумкинлигини айтган.
Россия Украинада кимёвий қурол қўллаши мумкинлиги нимани англатади?
АҚШ Россиянинг Украинага қарши кимёвий қурол қўллаши мумкинлигидан хавотирланмоқда. Агар Россия қўшинлари ўз позицияларини йўқотишда давом этса, бу сценарий юз бериши мумкин деб хабар бермоқда Politico америкалик амалдорларга таяниб.
АҚШ президенти Жо Байден маъмуриятининг бир қанча мулозимлари Россия ядро қуролидан фойдаланишга уринишдан олдин кимёвий қуролга мурожаат қилиши мумкин, деб ҳисобламоқда.Бу эҳтимолни кўрсатадиган бирорта разведка маълумотлари йўқлигига қарамай, агар жанг майдонида йўқотишлар давом этса ёки Россия армияси бутунлай қуласа, Кремль кимёвий моддалардан фойдаланишга уриниши мумкин, деб ҳисоблашмоқда расмийлар.
«Сиёсатчилар ва мутахассисларнинг таъкидлашича, Москва бир вақтнинг ўзида бир ёки икки кишига қарши ‘Новичок’ — нервлар фалажига олиб келадиган заҳарни қўллагани маълум бўлса-да, баъзи кимёвий моддалар оммавий қўлланиши мумкин. Мисол учун, айрим моддалар аэрозолга айлантирилиши ёки йирик гуруҳга зарар етказиш учун ўқ-дорилар билан ишлатилиши мумкин», — дейилади газета хабарида.
АҚШ анчадан буён Россия кимёвий қурол салоҳиятига сармоя киритаётганидан хабардор. Расмийлар Кремль «жангнинг ноанъанавий усуллари»га мурожаат қилиши мумкинлигидан хавотирда. Шу билан бирга, бундай хавотирлар Оқ уйни эҳтимолий кимёвий ҳужумни аниқлаш ва унга тайёргарлик кўриш тизимини такомиллаштиришга ундамоқда.
Ўзбекистон конституциясига киритиладиган янги моддалар кимларнинг таклифига кўра ишлаб чиқилмоқда?
Ўзбекистон конституциясига 15 та янги модда ва 1 та янги боб киритилиши кутилмоқда. Бу ҳақда Олий Мажлис Қонунчилик палатаси депутати Алишер Қодиров маълум қилди. Унинг билдиришича, конституциянинг 76 та моддасига ўзгартиш ва қўшимчалар билан бирга, 15 та янги модда ва 1 та янги боб киритилмоқда. Лойиҳада фуқаролар томонидан тақдим қилинган 160 мингга яқин таклифлардан ҳам кенг фойдаланилган.
Айни пайтда «Миллий тикланиш» ва ЎзЛиДеП партия фракциялари қонун лойиҳасини Олий Мажлис Қонунчилик палатасининг ялпи мажлиси муҳокамасига киритиш ташаббусини қўллаб-қувватлади.
Депутат Одилжон Тожиевинг маълум қилишича, мазкур масала Қонунчилик палатасининг Ялпи мажлисида кўриб чиқилади. У қонун лойиҳасининг умумхалқ муҳокамаси 2 ойдан кўп вақт мобайнида аҳолининг барча қатламларини қамраб олган ҳолда, очиқлик ва ошкоралик принциплари асосида ташкил этилганини қайд этиб ўтган.
Изоҳ (0)