Ўзбекистон ва Франция президентлари Араб дунёси институтига ташриф буюрди (фото)
Шавкат Мирзиёев ва Франция президенти Эманнуэл Макрон рафиқалари билан биргаликда Париждаги Араб дунёси институтига ташриф буюрди. Бу ҳақда прзидент матбуот хизмати хабар берди.
Бугунги кунда бу ерда институт ва Ўзбекистон Вазирлар Маҳкамаси ҳузуридаги Маданият ва санъатни ривожлантириш жамғармаси ҳамкорлигида «Самарқандга йўл. Ипак ва олтин мўъжизалари» номли кўргазма ташкил этилган. Унда Ўзбекистоннинг XIX аср охири – ХХ аср бошларига оид бой моддий маданияти тақдим этилган.
Ўзбекистоннинг 9 та энг йирик музейидан 300 дан ортиқ экспонат жорий йилнинг 23 ноябрь кунидан 2023 йил 4 июнь кунига қадар илк бор Францияда кенг халқаро жамоатчилик эътиборига ҳавола этилади.
Кўргазмадан Нукус, Самарқанд, Бухоро ва Тошкент музейларидан келтирилган тўқимачилик буюмлари, либос ва пойабзаллар, бош кийим тўпламлари, шунингдек, Туркистон авангарди йўналишига мансуб 24 та мўйқалам асари ўрин олган. Тайёргарлик доирасида 89 та заргарлик буюмлари реставрация қилинди.
Президентлар учун кўргазма бўйлаб экскурсия ўтказилди, экспонатлар тўғрисида батафсил сўзлаб берилди. Ҳунарманднинг юксак ижодий тафаккури ва маҳоратидан далолат берувчи ушбу буюмларнинг ранг-баранглиги ва нафосати Франция томонида ҳайрат уйғотди.
Шу билан Ўзбекистон президентининг Францияга расмий ташрифи якунланди. Президент Эммануэль Макрон ва рафиқаси Шавкат Мирзиёев ва рафиқаси билан хайрлашди.
Мавзуга доир:
- Фото: Шавкат Мирзиёев ва Эммануэль Макрон рафиқалари билан Лувр музейини айланди
- Париждаги Елисей саройида Шавкат Мирзиёев ва Эммануэль Макрон ўртасида учрашув бўлиб ўтди
- Парижда Шавкат Мирзиёевни расмий кутиб олиш маросими бўлди (фото)
- Шавкат Мирзиёев Франция Миллий йиғини раисини Ўзбекистонга таклиф қилди
- Шавкат Мирзиёев Франция миллий ассамблеясига ташриф буюрди
