Ўзбекистоннинг Истанбул шаҳридаги Бош консулхонаси 13 ноябрдаги портлаш оқибатида енгил даражада шикастланган Ўзбекистон фуқаролари борлигини маълум қилди.
Бош консулхонанинг билдиришича, Истанбул губернаторлиги билан боғланиб теракт оқибатида яраланган ва шифохонага келтирилган шахслар ҳақида маълумот олди. Улар орасида Ўзбекистон фуқаролари қайд этилмаган.
Воқеа натижасида яраланган 81 кишидан 8 нафари хорижий давлат фуқаролари эканлиги аниқланган.
Шу билан бирга, расмий маълумотларда эълон қилинган 6 нафар вафот этган ва 81 нафар яраланганлардан ташқари турли хил енгил даражадаги шикастлар олиб шифохонага мурожаат қилмаган ҳолда тиббий ёрдам олган Ўзбекистон фуқаролари ҳам борлиги аниқланмоқда. 14 ноябрь куни Ўзбекистон фуқароси бўлган блогер, жамоатчилик фаоли Ислам Капарзо ҳам енгил даражада шикастланганини маълум қилганди.
«Ватандошларимиздан шахсий хавфсизликларига эътиборли бўлишларини сўраб қоламиз», — дейилади Бош консулхона ахборотида.
Портлаш Истанбулнинг Беёғлу тумани, Истиқлол кўчасида 13 ноябрь, якшанба куни содир бўлганди. Бу кўча пиёдалар учун мўлжалланган бўлиб, сайёҳлар учун энг машҳур жойлардан бири саналади. Истанбул Бош прокуратураси воқеани теракт сифатида баҳолади. Портлаш содир этган шахс қўлга олинган.
Шавкат Мирзиёев портлаш оқибатида кўплаб инсонлар қурбон бўлгани ва жиддий жароҳат олгани муносабати билан Ражаб Тоййиб Эрдўғонга таъзия йўллади.
Мавзуга доир: Фоторепортаж: Истанбулдаги энг оммабоп пиёдалар кўчаларидан бири — Истиқлол портлашдан кейин
Изоҳ (0)