АОКАда 15 ноябрь куни Ўзсаноатқурилишбанк томонидан аҳоли мурожаатлари билан ишлаш соҳасида ўтган 9 ой давомида амалга оширилган ишларга бағишланган брифинг ўтказилди.
Президент раислигида 2021 йил 23 июлда аҳоли мурожаатлари билан ишлаш тизимини янгича ташкил қилиш чора-тадбирлари бўйича ўтказилган видеоселектор йиғилишида бу борада ҳар бир раҳбарнинг ўз стратегияси бўлиши лозимлиги таъкидланган эди. Брифингда қайд этилганидек, Ўзсаноатқурилишбанк фаолиятида жисмоний ва юридик шахсларнинг мурожаатлари билан ишлаш тизимли йўлга қўйилган. Унинг ижроси юзасидан доимий ўрганишлар олиб борилмоқда.
2022 йилнинг ўтган 9 ойи бўйича ўтказилган таҳлил натижаларига кўра, жисмоний ва юридик шахслардан жами 935 та мурожаат келиб тушган. Шундан, 267 таси ижобий ҳал этилган, 606 таси бўйича амалдаги меъёрий ҳужжатларга асосан тушунтиришлар берилган ва 62 таси қонун нормаларига зид бўлгани сабабли кўрмасдан қолдирилган.
Ҳудудлар кесимида асосий мурожаатлар Тошкент шаҳри аҳолисидан келиб тушган: умумий мурожаатларнинг 27,1 фоизини ташкил этади. Шунингдек, бу кўрсаткич Тошкент вилояти бўйича 14,5 фоиз, Қашқадарё вилояти миқёсида 7,1 фоиз, Сурхондарё вилояти мисолида 7 фоиз ва Фарғона вилояти бўйича 6 фоизни ташкил қилади.
Мурожаатларнинг 293 тасида кредит тўлови муддатларини узайтириш сўралган бўлса, 147 тасида чакана бизнес йўналишидаги масалалар, 132 тасида миллий валютада кредит ажратиш, 46 тасида эса ишга жойлашиш билан боғлиқ мурожаатлар ўрин олган.
Ҳисобот даврида банк раҳбарияти томонидан 30 дан ортиқ сайёр қабул ташкил этилиб, уларда жисмоний ва юридик шахсларга тегишли 90 дан зиёд мурожаатлар ижобий ҳал қилинди. Бундан ташқари, бугунги кунда банкнинг бош офисидаги ишонч телефонига келиб тушаётган оғзаки мурожаатларга ҳам тезкорлик билан жавоб бериб келинмоқда. Бу борада ўтган 9 ой давомида 6500 дан зиёд қўнғироқлар орқали билдирилган таклиф ва эътирозлар ечими тегишли тузилмалар томонидан ҳал этилди.
Брифингда қайд этилганидек, банк тизимида аҳоли мурожаатлари билан ишлашда тузилмалар, ҳудудий тармоқлар ҳамда масъул шахслар фаолияти алоҳида ўрганиб борилади. Ҳисобот санасида банкнинг ҳудудий тармоқларида ўтказилган ўрганишлар натижасида жисмоний ва юридик шахсларнинг мурожаатлари бўйича ишлаш соҳасидаги 12 та ҳолат бўйича камчилик аниқланган. Бундай ҳолатга йўл қўйган 6 нафар масъул ходимга ҳайфсан интизомий жазо чораси ва 6 нафар ходимга ўртача ойлик иш ҳақининг 10 фоизи миқдорида жарима жазоси қўлланган.
Тизимда аҳоли мурожаатлари билан ишлашда бундай ҳолатларнинг олдини олиш мақсадида алоҳида чора-тадбирлар дастури ишлаб чиқилган. Унга биноан банк бош офисидаги таркибий тузилмалар ҳамда минтақавий тармоқларда аҳоли мурожаатлари билан ишлаш тизимига қатъий риоя қилиниши ва бу борада жавобгарлик шахсан раҳбарлар зиммасида бўлиши белгиланган.
Реклама ҳуқуқи асосида.
Изоҳ (0)