Украинанинг Николаев шаҳрига ракета ҳужуми оқибатида беш қаватли турар жой биноси вайрон бўлди.
Шаҳар мери Александр Сенкевичнинг сўзларига кўра, Россия қўшинлари 11 ноябрга ўтар кечаси турар жой ҳудудини ўққа тутган, ракеталардан бири беш қаватли бинога келиб тушган. «Бешинчи қаватдан биринчи қаватгача вайрон бўлди», — деб ёзди Сенкевич Telegram каналида.
Николаев раҳбарининг сўзларига кўра, ракета ҳужуми оқибатида камида икки киши ҳалок бўлган ва бир киши яраланган. Журналист Анатолий Шарий тарқатган тасдиқланмаган маълумотларда эса беш киши ҳалок бўлгани айтилмоқда.
Украина президенти Владимир Зеленский Николаевдаги вайронагарчилик видеосини эълон қилди ва шаҳарнинг ўққа тутилишини «фронтдаги муваффақиятларимизга террорчи давлатнинг беҳаёларча жавоби» деб атади.
9 ноябрь куни Россия қўмондонлиги Днепрнинг ўнг қирғоғидан қўшинларини олиб чиқишни эълон қилди. Чекинган тақдирда, Россия Николаев вилоятининг бутун босиб олинган ҳудудини, шунингдек, Херсон вилоятининг бир қисмини, жумладан марказ Херсон шарини йўқотади.
Владимир Зеленский 10 ноябрь куни Украина Қуролли кучлари Украина жанубидаги 40 дан ортиқ аҳоли пунктларини озод қилганини маълум қилди. 10 ноябрь куни Украина ҳарбийлари Днепрнинг ўнг қирғоғидаги муҳим логистика маркази бўлган Снигирёвка шаҳрини (Николаев вилоятида) қайтариб олганини эълон қилди.