Самарқандда ўтказилган Туркий давлатлар ташкилоти Ташқи ишлар вазирлари кенгаши йиғилишида нутқ сўзлаган Владимир Норов ташкилотга янги бош котиб тайинланганини маълум қилди.
Сўнгги уч йилда Туркий давлатлар ташкилоти бош котиби вазифасини бажариб келган Боғдод Култаевич Амреевнинг ваколат муддати тугади. Ушбу лавозимга Омуралиев Кубаничбек Қосимович тайинланди.
Ташкилот бош котиблиги муддати — уч йил.
Очиқлик, тенг ҳуқуқлилик ва ўзаро ҳурмат тамойилларига қатъий содиқлик асосида суверенитет, ҳудудий яхлитлик, хавфсизлик ва барқарор ривожланишга бўлган таҳдидларни енгиш учун кўп қиррали муносабатларимизни мустаҳкамлаш ва кенгайтириш ҳамда умумий имкониятларимизни оширишимиз зарур.Ташкилот давлатларининг ушбу ва бошқа асосий йўналишлар бўйича қўшма ёндашувлари Туркий давлатлар ташкилотининг 2022—2026 йилларга мўлжалланган стратегиясида ўз аксини топган ва биз бугун ушбу ҳужжатни тасдиқлаймиз.
Туркий дунёнинг иқтисодий мезони ҳамкорликнинг локомотиви ва халқларимиз фаровонлигининг асоси бўлиши лозим. Мамлакатларимизнинг етакчи саноат корхоналари, инвестиция компаниялари, банк ва молия институтлари ҳамда тадбиркорлари ўртасида кооперация алоқаларини мустаҳкамлаш, самарали минтақавий ҳамкорликни қуриш зарур.
Олдимизда минтақалараро савдо соҳасида жиддий ишларни амалга ошириш вазифаси турибди.
Мамлакатларимиз ўртасидаги ўзаро товар айирбошлаш ҳажми Ташкилотга аъзо давлатларнинг 970 миллиард доллардан ортиқ умумий товар айланмаси ҳажмининг 3 фоизидан камроғини (21 миллиард доллар) ташкил этади.
Бу кўрсаткични бир неча баробар оширишни ҳаммамиз хоҳлаймиз. Ишончим комилки, биз биргаликда бу мақсадга эришамиз, — дейди Ўзбекистон ташқи ишлар вазири.
Изоҳ (0)