Бу йилги G20 саммитига мезбонлик қиладиган Индонезия президенти Жоко Видодо Россия президенти Владимир Путиннинг тадбирга ташриф буюрмаслигидан «қаттиқ таъсирланганини» айтди, деб ёзади The Financial Times.
Индонезия раҳбари газетага берган интервьюсида Путин билан сўнгги мулоқотидан сўнг Россия президенти 15—16 ноябрь кунлари бўлиб ўтадиган Балидаги саммитга бориш ниятида эмасдек таассурот қолдирганини айтди. Кремль сайтидаги маълумотларга кўра, Путин ва Видодо охирги марта 2 ноябрь куни телефон орқали гаплашган.
G20 клубига 19 та давлат (Аргентина, Австралия, Бразилия, Германия, Ҳиндистон, Индонезия, Италия, Канада, Хитой, Буюк Британия, Мексика, Россия, АҚШ, Туркия, Франция, Жанубий Корея, Жанубий Африка, Саудия Арабистони ва Япония) ва бутун Евроиттифоқ киради.
Бу галги саммитга Украина президенти Владимир Зеленский ҳам таклифнома олди. У аввалроқ Балига «Россия етакчиси» у ерда бўлмаган тақдирдагина келишини айтган эди.
7 ноябрь куни Кремль Путиннинг шу ҳафта G20 саммитига бориш-болмаслигини эълон қилишга ваъда берди. Давлат раҳбарининг ўзи октябрь ойи охирида ташриф ҳақида «ўйлаб кўришини» айтган эди.
Изоҳ (0)