Олий ва ўрта махсус таълим вазири Абдуқодир Тошқулов Тошкент давлат иқтисодиёт университетида магистрлар учун маҳорат дарси ўтди. Бу ҳақда вазирлик ахборот хизмати эълон қилган вазир билан интервьюда айтилган. Абдуқодир Тошқулов суҳбатда университетда дарс бериши, талабалар билан мулоқотда бўлишга интилиши, вазирлик ва таълим муассасалари раҳбарлари ҳам шундай қилишлари лозимлиги тўғрисида гапирган.
«Университетда дарс бераман»
Умуман олганда, университетда 0,5 ставка (штат бирлиги)да дарс бераман ва бунга ҳақ оламан. Албатта, бундан кўзланган мақсадлар бор. Биринчидан, ўзим аудиториядан чиқиб кетмаслигим керак, яъни ҳукумат аъзоси сифатида фақат йиғилишлар, топшириқлар бериш билан чекланиб қолмаслигим зарур. Иккинчидан, талаба бор — олий таълим муассасаси бор, талаба бор — вазирлик бор. Демак, талабаларнинг томири менинг қўлимда бўлиши керак. Дарс жараёнида уларнинг ижтимоий ҳаёти ва таълим сифати ҳақида сўраш имконияти бўлади. Масалан, ўқитувчилар қандай қай тарзда билим бераётгани, талабалар мустақил таълим бўйича қанақа топшириқлар олаётгани, барчасини билиб оламиз. Мени фикримча, талаба алдамайди, у қалби ва тилидагини юзага чиқаради. Шунинг учун дарс жараёнида шундай имкониятлар бор.
Бугун магистрларга дарс ўтдим ва уларнинг билим ҳамда савиясидан ҳақиқатан қониқдим. Бизда ҳамма нарса ёмон дейдиган норозилик синдромига дуч келамиз. «Бизда олий таълим сифатсиз», дейдиганлар ҳам бор. Бор, гуруч курмакциз бўлмайди. Лекин кейинги 5-6 йилда фақат ва фақат шароит, таълимда рақобат муҳитини яратиш бўйича буни аксини кўраяпмиз. Бугун талабаларнинг савол-жавобларидан кўринадики, улар нафақат фан доирасида ҳозирги давлатчилигимиз, Ўзбекистоннинг ички ва ташқи сиёсатига ҳам жуда қизиқяпти. Қизиқиш баробарида фикрларини ҳам теран айтаяпти. Мен университетга келганда хурсанд бўлиб кетаман, тўғриси. Биринчидан, ўша раҳбарлик қобиғидан чиқамиз. Иккинчидан, Ўзбекистоннинг келажаги ишончли қўлларда эканига амин бўламиз. Бу битта шу университетга хос эмас. Ўзини ҳурмат қилган ректор ва ўқитувчилар жамоаси, ўзини ҳурмат қилган олий таълим муассасасида геометрик прогрессия тарзида ривожланиш бўляпти.
«ОТМ раҳбарияти дарс бериши керак»
Интервью ва дарс жараёнини ёритишга рози бўлишимга иккита сабаб бор. Биринчидан, бу ҳурматли ректорлар, проректорлар, деканлар, қолаверса, кафедра мудирларига аудиториядан узилмаслик учун топшириқ, ҳам сигнал. Буни вазирлик мониторинг қилиб, ўрганиб боради. Нега ректор дарс бермаслиги керак? Ректор ҳақ олинадиган тарзда дарс бериши керак. Аудиторияга кириши лозим. Унинг ўрнига ассистент ўтиши керак эмас, ҳар ҳолда ректорнинг ташвиши, юмуши вазирдан кўп бўлмаса керак. Бугун оммавий ахборот воситаларига чиқиб, ўзимизнинг тизимимизга талаб қўйишга ҳаққим бор. Ректорлар, проректорлар, умуман, олий таълим муассасаси раҳбарияти дарс бериши керак. Шунда ўзгариш бўлади. Талабани қалбига қўл солиш керак. Қуруқ, чиройли гаплар, тадбирлар, фаоллар залидаги йиғилишлардаги чиқишлар масалани тўлиқ ҳал қилмайди.
Иккинчидан, ҳамкасбларим, ҳукумат аъзолари, давлат бошқарув органлари раҳбарларига, университет мисолида олиб қаралса, банкирларга, солиқчилар ва божхона қўмитаси раҳбариятига мурожаат қилмоқчиманки, эртанги кадрларингизни бугун келиб сараланг. Келиб иккинчи, учинчи босқичдан, магистрантларга дарс ўтинг. Масалан, мен ҳозир вазирликка ишга олиш бўйича 4-5 нафар талабани кўз остимга олиб қўйдим. 4-5 та дарс мобайнида синаб, қайси бирларини менга ёрдамчи, бошқаларини бирор департаментга ярим ставка ҳақ тўланадиган ишга ола бошлаймиз. Шунинг учун, ҳар бир соҳа ўзининг келажагини келиб сараласин, танласин, амалиётдан ўргансин.
Ҳам мурожаат, ҳам топшириқ
Бугун ёшларга таклиф бердимки, кейинги дарсларни вазирликда ўтамиз, ўша ерда экскурсия қиласиз, у ерда вазирлик фаолиятини ўрганасиз деб. Эътибор бердимки, мен ҳозир дарс ўтган аудиторияни «Туронбанк» жиҳозлаб берган экан. Яъни буларнинг кўз ўнгида шу муҳрланиб қоляпти. Эртага улар «Туронбанк» учун яхши кадр бўлиб етишиб чиқишга ҳаракат қилади. Шунинг учун олий таълим соҳасини муҳокама қилган яхши. Илмий даражаси борми, йўқми, давлат ҳокимиятидагилар, етук тадбиркорлар, бизнесменлар, марҳамат келиб, ўзини ривожлантириш бўйича лексиялар ўқишсин, биттагина фанни олиб, битта аудиторияни жиҳозлаб беришсин, ётоқхонадан тўртта хонани жиҳозлаб беришсин. Бу бутун жамият ва давлат иши. Бугун келиб доимий дарслардан бирини ёритилишига рози бўлганимиз ҳам бир томондан мурожаат, иккинчи томондан топшириқ бўлиши учундир. Ўзимизнинг йўналиш мониторинги бўйича тегишли топшириқларни бераман. Ҳар бир раҳбар таълим муассасалари, давлат органлари билан жамиятнинг алоқасини яхшилаши керак, жамоатчилик назоратини кучайтириш лозим. Танқид ўз йўлига, танқид ҳам ойна. Лекин битта танқид қилиб қўйиш билан масала ҳал бўлмайди. Бунга иштирокчи керак, яхшилаш бўйича елкама елка туриш зарур.
Изоҳ (0)