7 ноябрь куни Шавкат Мирзиёев ва Туркманистон Миллий кенгаши халқ маслаҳати раиси Гурбангули Бердимуҳамедовнинг телефон орқали мулоқоти бўлиб ўтди.
Президент матбуот хизматининг хабар қилишича, Ўзбекистон билан Туркманистон ўртасидаги дўстлик, яхши қўшничилик ва стратегик шериклик муносабатларини янада ривожлантириш ва кенгайтиришнинг долзарб масалалари кўриб чиқилди.
Суҳбат аввалида давлатимиз раҳбари Туркманистон президенти Сердар Бердимуҳамедовга ўзининг самимий саломи ва энг эзгу тилакларини билдирди.
Ўзбекистон президентининг 20—21 октябрь кунлари Туркманистонга амалга оширилган расмий ташрифи давомидаги олий даражали учрашув ва тадбирларнинг самарали натижалари юксак баҳоланди.
Эришилган келишувлар ва имзоланган битимларни, шу жумладан фаол парламентлараро мулоқотлар ва алмашинувларни давом эттириш орқали амалга ошириш муҳимлиги қайд этилди.
Шу ҳафта охирида Самарқандда ўтказиладиган Туркий давлатлар ташкилоти саммитининг кун тартибидаги масалалар ҳам кўриб чиқилди.
Шавкат Мирзиёев Гурбангули Бердимуҳамедов билан бундан аввал Туркманистонга расмий ташриф доирасида учрашганида суҳбатлашганди. Икки томонлама, минтақавий ва халқаро ҳамкорлик масалаларининг кенг доирасини муҳокама қилиб, учрашув сўнгида Гурбангули Бердимуҳамедов Шавкат Мирзиёевга туркман халқи алоҳида қадрлайдиган алабай зотли кучук совға қилганди.
Изоҳ (0)