Бухоро вилоятининг Бухоро тумани ҳамда Қашқадарё вилоятининг Қарши шаҳрида ер майдонлари савдоси билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Бухоро вилоят бошқармаси томонидан ИИБ ходимлари билан ҳамкорликда тезкор тадбир ўтказилган. Унда фуқаро О.А. (муқаддам судланган) фуқаро Ч.Б.нинг ишончига кириб, Бухоро туман «Боғидашт» МФЙ ҳудудидан унинг синглиси номига савдо ва маиший хизмат кўрсатиш биноси қуриш учун давлат-хусусий шерикчилик шартлари асосида ажратилган 7 сотих ер майдонини 105 000 долларга сотишга келишгани аниқланган. У олдиндан 30 000 доллари ва 200 миллион сўмни олган вақтида ашёвий далиллар билан ушланган.
Шунингдек, департаментнинг Қарши шаҳар бўлими томонидан ИИБ ходимлари билан ҳамкорликда тезкор тадбир ўтказилган. Унда фуқаро А.Ж. фуқаро М.А.га танишлари орқали Кўкдала тумани «Аннаруз» МФЙ ҳудудида жойлашган 60 сотих захирадаги ер майдонини унинг номига расмийлаштириб беришини айтгани аниқланган. У эвазига 150 миллион сўмни олган вақтида ашёвий далиллар билан қўлга олинган.
А.Ж.нинг кўрсатувига асосан давом этган тадбирда бошқа бир фуқаро М.Б. фуқаро А.Ж.дан 60 сотих захирадаги ер майдонини М.А.нинг номига расмийлаштириб бериши эвазига 130 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)