Путин Гурбангули Бердимуҳамедовга «Ватан олдидаги хизматлари учун» орденини топширди

Россия президенти Владимир Путин Туркманистон собиқ президенти Гурбангули Бердимуҳамедовга IV даражали «Ватан олдидаги хизматлари учун» орденини топширди. Бу ҳақда Кремль сайтида хабар берилади.

«Сизнинг раҳбарлигингиз остида ўтган йилларда биргаликда эришган натижаларимиздан жуда фахрланамиз. Таъкидлашим керакки, сиз муносабатларимиз ривожланишига жуда яхши туртки бердингиз, ва бу динамика янги президент келганидан кейин ҳам пасаймаяпти… Бу жуда юксак мукофот, у сиз томонингиздан давлатлараро муносабатларимизга қўшилган ҳиссага тўлиқ мос келади», — деди Путин.

Собиқ президент россиялик ҳамкасбига миннатдорлик билдирди ва давлат раҳбари Сердар Бердимуҳамедовнинг «энг илиқ сўзлари, эзгу тилаклари»ни етказди.

Путин Бердимуҳамедовни IV даражали «Ватан олдидаги хизматлари учун» ордени билан тақдирлаш тўғрисидаги фармонни август охирида имзолаган эди.

1 ноябрь куни Россияга ташрифи чоғида Бердимуҳамедов Федерация кенгаши ва Халқ маслаҳати (Туркманистон парламенти юқори палатаси) ҳамкорлиги бўйича парламентлараро комиссия тузиш тўғрисидаги битимни Федерация кенгаши раиси Валентина Матвиенко билан бирга имзолади.

Гурбангули Бердимуҳамедов 2007 йилда, давлатнинг биринчи раҳбари Сапармурат Ниязовнинг вафотидан кейин Туркманистон президентига айланган эди. Бердимуҳамедов ҳукмронлиги даврида мамлакатда унинг шахсига сиғиниш юзага келди, унинг ўзи эса «Аркадағ» («Катта таянч», «Ортимизда турган тоғ») деган расмий номга эга бўлди.

Бердимуҳамедов 2022 йил бошида президент лавозимини муддатидан олдин тарк этди ва буни «ёшларга йўл бериш» зарурлиги билан изоҳлади. Мамлакатнинг янги президенти этиб унинг ўғли Сердар Бердимуҳамедов сайланди.

Май ойида Россия президенти Владимир Путин Туркманистон раҳбари Сердар Бердимуҳамедовни «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» Дўстлик ордени билан тақдирлаган эди.

2017 йилда худди шундай сабаб билан — «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» Путин ўша вақтдаги Туркманистон президенти Гурбангули Бердимуҳамедовни ҳам тақдирлаганди. Аммо катта Бердимуҳамедовга Дўстлик ордени эмас, балки Александр Невский ордени берилган.