Тан олинмаган Тоғли Қорабоғ республикаси президенти Арайик Арутюнян тадбиркор ва миллиардер Рубен Варданянни янги бош вазир этиб тайинлади. Бу ҳақда президентнинг расмий сайтида хабар берилган. Худди шу фармон билан собиқ бош вазир Артак Бегларян лавозимидан озод этилган.
Сентябрь ойида Рубен Варданян Россия фуқаролигидан воз кечиб, Тоғли Қорабоғга кўчиб ўтганини маълум қилганди. Шундан сўнг тан олинмаган республика раҳбари Варданянга республика бош вазир лавозимини эгаллашни таклиф қилди.
Варданяннинг сўзларига кўра, у Тоғли Қорабоғ аҳолиси, республиканинг сиёсий ва жамоат арбоблари билан учрашганидан сўнг ҳукумат раҳбари бўлиш тўғрисида қарор қабул қилган, чунки улар ушбу лавозимга тадбиркорнинг номзодини қўллаб-қувватлашини билдирган.
Россия-арманистонлик Рубен Варданян — «Тройка Диалог» инвестицион компаниясининг собиқ эгаси, «Сколково» бизнес-мактаби асосчиси. 2021 йилда Forbes журнали унинг бойлигини бир миллиард долларга баҳолаган, у Россиянинг 200 нафар энг бой одамлари рўйхатида 116-ўринни эгаллаган эди.
2022 йил сентябри ўрталарида Арманистон ва Озарбайжон чегарасида жанговар ҳаракатлар қайта бошланди. Низо томонлари вазиятни кескинлаштиришда бир-бирини айблади. Расмий маълумотларга кўра, ўшанда 200 дан ортиқ одам ҳалок бўлган. Турли даражадаги тўқнашувлар октябрда ҳам давом этмоқда.
Изоҳ (0)