«Топшириқ ўқитувчиларга қаратилган бўлиб, дарсда ўқувчиларга қишлоқдаги ‘свет’, газ муаммолари ҳақида гапирмаслиги ҳақида эди». Андижондаги шов-шувли воқеа ташаббускорлари ҳаракатига изоҳ берди

Андижонда мактаб ўқувчиларига вилоят ҳокими Шуҳрат Абдураҳмонов билан учрашувда саволларга шукроналик билан жавоб бериш лозимлиги, «свет» ва газ муаммосидан гапирмаслик, кўзи ёниб, кулиб туриши талаб қилинган хабарлар тарқалганди.

«Дарё» мухбири мазкур топшириқ кимдан чиққанини, шунингдек, бу ҳолатга туман ҳокими қандай изоҳ беришини билиш мақсадида Жалақудуқ туманидаги 10-мактабда бўлди.

Туман ҳокими Ҳикматилло Латиповнинг айтишича, 2022 йилнинг 2 ноябрь куни мактабда ҳеч қандай учрашув ўтказиш белгиланмаган. Шунингдек, ҳеч кимга тайёргарлик кўриш бўйича топшириқ ҳам берилмаган.

Ҳокимият вакиллари ёки кимдир бориб у ерда юқори органдан келадиган вакилларга «свет», газ ва коммунал масалаларида муаммойимиз йўқ деган гапни айтиши кераклиги таъкидланган. Авваламбор, у ерда раҳбарият, масалан мен билан ёшларнинг ҳеч қандай учрашуви белгиланмаган. Мактабнинг ўзида ҳақиқатдан тозалов ишларини ўтказаётган эдик. Оқлаш, кўклаш, қишга тайёргарлик, иситиш тизими ва бошқа нарсалар қилинаётган эди. Ушбу ишлар айнан бу мактабда эмас тумандаги ҳамма мактабларда амалга оширилмоқда. Ҳозир бошқа мактабга борсангиз, мисол учун 43-мактабда ҳам шу худди шу жараён давом этяпти. Фақат энди бу ерда қандайдир ўқитувчиларнинг ўртасида медиасаводхонликнинг етишмаганлигими ёки бу нарсадами тушунмовчилик келиб чиққан. Ижтимоий тармоқларда шундай фикрлар кетаяптики, тўғрисини биз ҳам нима бўлаётганини тушунмаяпмиз, — дейди Жалақудуқ тумани ҳокими.

Ҳокимнинг таъкидлашича, ушбу мактабга вилоят ҳокими Шуҳрат Абдураҳмоновнинг келиши режалаштирилмаган.

Бу мактабда нафақат менинг, вилоят ҳокимининг ҳам ёшлар билан учрашуви белгиланмаган. Агарда учрашув бўлганда эди биз буни олдиндан билган бўлардик ва тайёргарлик қилиб, бошқа нарсаларни ўтказаётган бўлардик. Лекин режалаштирилмаган нарсалар орқасидан тушунмовчиликлар, эътирозлар бўляпти. Бунинг натижаси кимга кераклигини тўғриси, биз ўзимиз ҳам тушунмаяпмиз, — дейди туман ҳокими Ҳикматилло Латипов.

Ижтимоий тармоқларда тарқалган топшириқни ёзган мактаб тарғиботчиси Бахтиёра Мамажонованинг таъкидлашича, у «свет» ва газ муаммоси ҳақида болалар олдида гапирмаслик лозимлигини ўқитувчиларга қарата ёзган.

Ўқитувчининг тушунтиришича, мактаб директорининг маънавий-маърифий ишлар бўйича ўринбосари ўқитувчиларга дарс пайтида қишлоқда юзага келаётган муаммолар — электр токининг ўчиши, газдаги муаммолар ҳақида гаплашмаслик ҳақида топшириқ бермоқчи бўлган ва бу топшириқни ёзма тарзда ёзишни мактаб тарғиботчисига топширган. Ҳамда тарғиботчи томонидан ёзилган матнлар директор ўринбосари томонидан мактабдаги гуруҳларга тарқатилган.

Бу ҳақида юқоридан алоҳида топшириқ олинмаган. Мактабимизда ҳоким ташрифи кутилмаган. Мен ёзган гаплар кундалик топшириқлар эди. Кундалик ўқув жараёнларида ўқувчиларга бериб борилиши керак бўлган саволлар ва уларнинг жавоблари эди. Англашилмовчилик бўлган. Аслида Telegram’да учта хабар бир-бирига қўшилиб кетган. Бу эса мактабнинг ички гуруҳларига, сўнгра ташқи гуруҳ ва каналларга тарқалиб кетган.

Бу топшириқ аслида ўқитувчиларга берилган бўлиб, бундан мақсад ўқитувчилар дарс пайтида ёш болаларга қишлоқдаги муаммолар ҳақида гапириб юрмасликлари учун бўлган. Бола ўйнаб кулиши керак. Ёшлик даврининг гаштини суриши керак. Ўқиши, илм олиши, боя айтиб ўтганимдай шукроналик ҳисси билан улғайиши керак, — дейди гапи-гапига қовушмаган ўқитувчи.

Жамоатчилик, шунингдек Telegram каналларида тарқалган ва саводсизларча ёзилган топшириқда қўпол хатога йўл қўйилганига ҳам эътибор қаратган. Ўзларининг наздида ўқитувчиларга берилган топшириқ, шунингдек кундалик савол-жавоблар ҳақидаги ёзишмаларда давлат гербининг қабул қилинган санаси 1998 йил 2 июль деб кўрсатилган. Ҳолбуки, Ўзбекистон Республикасининг давлат герби 1992 йил 2 июль куни қабул қилинган.

Шу топшириқни берган ёки бу ёзишмаларни мактаб гуруҳларида тарқатган, шунингдек бу ёзишмаларни ўқиган мактаб директори, ўринбосарлари, бошқа ўқитувчилар, жумладан тарих фани ўқитувчилари наҳотки шу оддий маълумотда хато қилишган ёки тўғрилашга ақли етмаган бўлса, — дейди мазкур ҳолат ҳақида «Дарё» мухбирига фикр билдирган суҳбатдошлардан бири.

«Дарё» мухбири мазкур мактаб масъуллари ва топшириқ муаллифи билан суҳбати давомида «ўқувчиларнинг келажакда ўқиш нияти бўлмаса-да, ҳокимга юз фоиз ўқиш нияти борлигини айтиши кераклиги ҳақида ёзилган топшириғи сабабига аниқлик киритолмаган. Боиси гапи-гапига қовушмаган масъулларнинг бу борада аниқ гапи бўлмаган.