Тошкент вилоятининг Ангрен ва Чирчиқ шаҳарларида мактаб жиҳозлари учун ажратилган маблағларни талон-тарож қилиш ҳолатлари аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Ангрен шаҳар бўлими томонидан терговга қадар текширув ўтказилган. Унда Т.З. МЧЖ раҳбари Г.Қ. Ангрен шаҳридаги мактаб-интернати директори V.У. билан ўзаро тил бириктириб, ушбу мактабга аслида етказиб берилмаган мактаб жиҳозларини қабул қилиб олгани тўғрисидаги ҳужжатларни сохталаштиргани аниқланган. Улар 474,3 миллион сўмни ўзлаштириш йўли билан талон-торож қилган.
Шунингдек, департаментнинг Чирчиқ шаҳар бўлими томонидан ўтказилган терговга қадар текширувда Т.З. МЧЖ иш юритувчиси Ф.Қ., ёрдамчиси Ш.А. ва Чирчиқ шаҳридаги ихтисослаштирилган мактаб директори Г.М. ушланган. Улар ўзаро тил бириктириб, ушбу МЧЖ томонидан мактабга аслида етказиб берилмаган офис мебелларини қабул қилиб олгани юзасидан ҳужжатларни сохталаштирган. Оқибатда 124,2 миллион сўм ўзлаштириш йўли билан талон-торож қилинган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят ишлари қўзғатилган. Ҳозирда тергов ҳарактлари ўтказилмоқда.
Изоҳ (0)