Ижтимоий тармоқларда ЙПХ инспекторлари Nexia-2 транспорт воситасини тўхтатишга уринаётгани акс этган видео тарқалди. Тошкент шаҳар Ички ишлар бош бошқармаси ҳолат юзасидан қуйидагиларни маълум қилди.
Қайд этилишича, 1 ноябрь куни тахминан соат 17.00 ларда А.Х. (2004 йилда туғилган) автомобилни бошқариш ҳуқуқини берувчи ҳужжатларга эга бўлмаган ҳолда Nexia-2 машинасини бошқараётган вақтида йўлда уч маротаба ЙПХ инспекторларининг қонуний талабларига бўйсунмасдан ҳаракатни давом эттирган.
Тўртинчи маротаба Юнусобод тумани Амир Темур ва Шаҳрисабз кўчалари кесишган чорраҳасида ЙПХ инспектори М.Турдиев томонидан жезл ва хуштак ёрдамида тўхташ ишораси берилганда, ҳайдовчи катта тезликда ҳаракатни давом эттирган. Бир нечта ходимларнинг қонуний талабларига бўйсунмасдан ҳаракатини давом эттираётган ушбу автомобиль ҳаракатини чеклаш мақсадида бошқа транспорт воситалари тўхтатилган.
Сўнг Амир Темур–Алишер Навоий–Шаҳрисабз кўчалари кесишган чорраҳада ЙПХ инспектори Д.Ганиев томонидан транспорт воситаси тўхтатиб қолинган. Ҳайдовчи ўзини шубҳали тутгани, ходимларнинг эшикни очиш ва транспорт воситасидан тушиш ҳақидаги қонуний талабига бўйсунмасдан, транспорт воситасини ичкаридан қулфлаб олгани сабабли транспорт воситасининг ойнасини синдириш орқали ҳайдовчининг эшиги очилган ва ҳайдовчининг транспорт воситасини бошқариш имконияти чекланган.
Мазкур ҳолат юзасидан ҳайдовчи А.Х.га нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) билан маъмурий баённома расмийлаштирилган. Транспорт воситаси жарима майдонига жойлаштирилган.
Изоҳ (0)