Энтони Хопкинс : Қандай қилиб оддий новвойнинг иккичи ўғли дунёга машҳур актёрга айланди?

2022 йилда британиялик актёр Энтони Хопкинс ўзининг 85 ёшини нишонлайди. Актёрнинг фильмографияси ҳақиқатан ҳам жуда бой — у 140 дан ортиқ фильмда рол ўйнаган ва бугунги кунда ҳам талабгир актёр саналади. Кўпчилик Хопкинсни «Қўзилар сукунати» фильмидаги Ганнибал Лектер, бошқалар «Икки папа» фильмидаги Рим папаси, айримлар эса «Тор» фильмидаги қирол Один билан ёдга олади. Аммо турли қийинчиликларга дуч келган актёрнинг машаққатли ҳаёт йўли ҳақида кўпчилик билмайди.

Энтони Уэльснинг кичик шаҳарчасида Муриэль Энн ва Ричард Артур Хопкинс оиласида туғилган. Унинг отаси новвой эди. Хопкинс баъзан ўзини танланганлардан бири деб ҳисоблаганида, дарҳол отаси ва унинг меҳнатдан қавариб кетган дағал қўллари ҳақида ўйлашини айтади.

Мактаб даврида Энтони ўқишга унчалик иштиёқманд эмас эди, натижада у бир неча маротаба мактабларни ўзгартиради. Бу ҳақда у шундай деб тан олади:

Мен ёмон ўқувчи эдим, бу мени доимий масхара қилиш объектига айлантирарди ва менда ўзини ерга уриш комплексини ривожлантирарди. Мен аҳмоқ эканлигимга мутлақ ишонч билан ўсганман.

Бундан ташқари, Хопкинс болалигиданоқ дислексиядан азият чеккан. Бу ҳақда у шундай деди: «Мен ёмон ўқиганман. Шунинг учунми бошқа болалар билан гаплашмасдим, мактабга ҳам нима учун келаётганимни англамасдим. Балки шунинг учун ҳам актёр бўлгандирман».

15 ёшида Энтони тасодифан актёр Ричард Бартон билан танишиб қолади ва ундан дастхат сўрайди. Бартон ёрдами билан Энтони Уэльс Қироллик мусиқа ва драма коллежига ўқишга киради ва уни 1957 йилда тамомлайди.

Кейинчалик бўлажак актёр Лондонга кўчиб ўтади ва 1963 йилда Қироллик драматик санъат академиясига ўқишга киради. Ўқиш бошланишидан бир йил олдин у биринчи марта саҳнага чиқади. 1965 йилда уни Лоренс Оливье пайқаб қолади ва Лондондаги Қироллик миллий театрига ишга таклиф қилади. Айнан Лоренс Оливье ёш актёрга саҳнага чиқишдан олдин ҳаяжонланмасликни ўргатган.

Театрдаги муваффақиятга қарамай, Энтони тинмай бир хил ролларни ўйнашдан чарчайди, шунинг учун у театрдан узоқлашади — телевидение ва кинода ўзини синаб кўра бошлайди. 1967 йилда «Оқ автобус» қисқа метражли фильми чиқади, унда у ўзининг дебют ролини ўйнайди. Бир йил ўтгач, 31 ёшида Хопкинс «Қишдаги шер» фильмида катта ролини ижро этади — натижада у «Энг яхши эркак роли» номинациясида BAFTA мукофотига номзод бўлади. Бу вақтда эса параллел равишда телесериалларда рол ўйнай бошлайди.

Хопкинс 1966 йилда актриса Петронелла Баркерга уйланади. 2 йилдан сўнг уларнинг қизи Абигейл туғилади, қизалоқ уларнинг ягона фарзанди бўлиб қолади. Энтони ва Петронелланинг никоҳи атиги 6 йил давом этади. Умрининг ўша даври ҳақида фикр юритар экан, актёр шундай дейди:

Мен жуда худбин бўлганман. Яхши эр ёки ота бўлолмадим. Қизим мен ҳақимда эшитишни ҳам хоҳламайди, лекин умид қиламанки, унинг ҳаёти ҳам, ишлари ҳам яхши.

Ота ва қиз ўртасидаги муносабат актёр бошқа аёлга уйланиш учун оилани тарк этгандан сўнг дарҳол узилади. Абигейл бундан қаттиқ азоб чекади.

Хопкинс 1973 йилда Женнифер Линтон билан оила қуради. Линтон актёр ўйнаган фильмлардан бирида продюсер ёрдамчиси бўлган. Улар танишган пайтда Хопкинс ҳали ҳам Петронелла билан ажрашмаган, аммо улар ўртасида яқин муносабатлар йўқ эди. Хопкинс ва Линтон Голливуд актёрининг карьерасидаги юксалиши давомида бирга бўлиб, биринчи «Оскар» қувончини ҳам бирга баҳам кўришади.

Кинотанқидчилар у ҳақида яхши гапиришларига қарамай, Хопкинснинг ўзи унинг ёмон одатларидан бири карьерасининг ўсишига тўсқинлик қилганини яхши билади. У 1975 йилда меҳмонхона номерида уйғонганида ва бу ерга қандай келиб қолганини эслай олмаганида тушунган эди. Актёр буни тан олади:

Мен бир неча ўн йиллар давомида ўзимни вайрон қилдим. Ичимдаги иблислардан қутулганимдан кейингина актёрликдан тўлиқ завқлана олдим.

Маъносиз эски ҳаётидан воз кечганидан сўнг, унинг карьераси шиддатли суръатда ўса бошлади. Бу даврда у «Сеҳр» (1978) ва «Фил-одам» (1980) фильмларида ўзининг энг кўзга кўринган ролларини ўйнайди.

1976 йилда Хопкинс «Линдбергни ўғирлаш» фильми учун «Эмми» мукофотига сазовор бўлди ва 5 йилдан сўнг «Бункер» фильми учун худди шу мукофотга яна лойиқ кўрилди. 1987 йилда у Британия империяси ордени қўмондони унвонини олди, 6 йилдан кейин эса рицар-бакалавр унвонига эга бўлди, бу унга ўз исмидан олдин «сер» унвонини қўшиш ҳуқуқини беради.

Бироқ Хопкинснинг энг гуллаган даври 1990 йилларнинг бошларида, у 53 ёшида бош ролни ижро этган «Қўзилар сукунати» (1991) фильмининг чиқиши билан келди. Ўшанда Хопкинсга қўнғироқ қилишиб, «Қўзилар сукунати» деб номланган сценарийни таклиф қилишади. Актёр эса ажабланиб «Нима бу, қандайдир болалар эртагими?» дейди. Аммо фильмдаги ролини ўқиб бўлгач, ўзи қайта қўнғироқ қилади ва: «Бу мен ўқиган энг яхши нарса!», — дея ҳеч иккиланмасдан фильмда ўйнашга рози бўлади.

Шундан сўнг у томошабинлар ва танқидчилар томонидан тан олинади. 1992 йилда у «Энг яхши эркак роли» номинациясида «Оскар» мукофотига сазовор бўлади. Қизиғи шундаки, актёрнинг кадрда кўринган умумий вақти тахминан 25 дақиқа, у фильмнинг атиги 21 фоизида иштирок этган. Кейинчалик Энтони яна икки марта «Ганнибал» (2001) ва «Қизил аждаҳо» (2002) фильмларида Ганнибал Лектер образини гавдалантиради. 2016 йилда актёр давомий фильмларда суратга тушиш хато эканлигини айтиб, бу ролни бошқа ҳеч қачон ўйнамаслигини таъкидлайди.

Бахтга қарши 2002 йилда Хопкинс ва унинг рафиқаси Женнифер ажрашишга қарор қилади. Бироқ Женнифер билан муносабатлари бузилмасидан аввал актёр колумбиялик Стелла Аррояве билан танишиб улгурганди. 2003 йилда жуфтлик турмуш қуради. Кейинчалик актёр Стелла уни том маънода омадсизлик ботқоғидан чиқариб олганини тан олади. У рафиқаси ҳақида шундай дейди:

У ҳамма нарсага ижобий муносабатда. Ундан ҳаётни қандай бўлса, шундайлигича яшаш кераклигини ўргандим.

2008 йилда Хопкинс озиш дастурида иштирок этади ва 2 йилдан кейин у 36 кг вазн ташлайди. Бир марта актёр бутун умри давомида мусиқа басталаганини ҳам тан олади.

Агар мактаб даврида етарлича ақлли бўлганимда, мусиқа коллежида яхши ўқиган бўлардим.

1986 йилда у ҳатто сингл чиқаради ва 2007 йилда у дунё бўйлаб концерт бериш учун кинони вақтинча тарк этишини эълон қилади. Хопкинс 2012 йилда мусиқий альбомини чиқаради.

2003 йилда актёр Голливуд Шон-шараф хиёбонида ўз юлдузига эга бўлди. Шу билан бирга, бир телеканал томонидан ўтказилган сўровномада у 100 та энг зўр киноюлдузлари рўйхатида 7-ўринни эгаллади. 2006 йилда кинога қўшган алоҳида ҳиссаси учун «Олтин глобус», 2008 йилда эса BAFTA мукофотлари билан тақдирланди.

2011 йилда актёр «Тор» суперқаҳрамонлик фильмида Один худоси сифатида пайдо бўлди. 2013 йилда у «Тор 2: Зулмат қироллиги», 2017 йилда «Тор: Рагнарёк» фильмларида ўз ролини такрорлади. 2012 йилда у «Хичкок» фильмидаги роли билан ўчмас таассурот қолдирди. У режиссёр Алфред Хичкок образида суратга тушиб, Хелен Миррен билан ажойиб тандем яратди. Бир йил ўтгач, у РЕД-2 жанговар комедиясида пайдо бўлди ва 2017 йилда «Трансформерлар: Сўнгги рицар» жанговар фильмида ҳам рол ўйнади.

2019 йилдан кейинг давр «Энтони Хопкинс карьерасининг қайта туғилиши» деб номланади. Ўшанда у «Икки папа» фильмида Рим папаси Бенедикт XVI ролида суратга тушган. Фильм танқидчиларнинг юқори баҳосига сазовор бўлди ва актёрнинг ўзи «Оскар» (бутун фаолиятидаги 5-номинация), «Олтин глобус» ва BAFTA мукоготларига сазовор бўлди.

У «Ота» фильмидаги роли учун яна бир «Оскар»ни олишга муваффақ бўлди. Унда у деменсия билан курашаётган одам образини ажойиб тарзда гавдалантирган. Айтганча, Хопкинс ушбу мукофотни қўлга киритган энг кекса актёрга айланди — ўша пайтда у 83 ёшда эди. Ғалаба уники бўлишини кутмагани учун актёрнинг ўзи маросимда иштирок этмайди. Эртаси куни у ижтимоий тармоққа видео жойлаштиради ва барчага миннатдорлик билдиради.

Хопкинс тасвирий санъатга ҳам бефарқ эмас. Бир неча йил олдин унинг рафиқаси эрининг эски расмларини топиб, уни расм чизишни давом эттиришга ундаган. Хопкинс ҳатто расмларини яхшигина нархга сотади ҳам.

Хопкинснинг тан олишича, ҳозирги ёшида фильмларда ўйнаш анча осон, бундан ташқари, агар актёр 99,99 фоиз мукаммал сценарийга эга бўлса, унда у умуман ҳеч нарса қилиши шарт ҳам эмас, деб ҳисоблайди.

Актёрнинг телефонида мактаб йилларидаги суратлари бор. Бу унга ҳаёт йўлида бўлган турли қийинчиликлар ва тўсиқлар ҳақида фикр юритишига ёрдам беради. Интервьюлардан бирида у шундай дейди:

Мен болаликдаги суратларимга қараб, «Болакай, иккимизнинг ҳам ишларимиз жуда яхши», дейман.

84 ёшида актёр томошабинлар ҳайратланарли деб атаган «Ўғил» (2022) фильмида рол ижро этди.

Ҳашаматни ёқтирасизми, деган саволга Сер Энтони Хопкинс шундай жавоб беради:

Унчалик эмас. Мен яхши овқатланишни ёқтираман, лекин янги ресторан очилишига ёки шунга ўхшаш жойларга бормайман. Мен ишлашни яхши кўраман, спорт залига бораман ва ўзимни формада сақлайман.

Хотини ҳамиша у жуда қаттиқ ишлаётганидан хавотирда. Бу ҳолатга эса актёр шундай жавоб беради: «Тишларим ва сочларим тўкилгандагина нафақага чиқаман. Ҳозир эса бекорчидек телевизорга тикилиб ўтиришдан маъно кўрмаяпман».