Ўзбекистон ИИВ муддати тугаган биометрик паспортларни ID-карталарга алмаштиришга чақирди

Ўзбекистон ИИВ фуқароларни муддати тугаган биометрик паспортларни кечиктирмаган ҳолда идентификацион ID-карталарга алмаштиришга чақирди.

Вазирлик Маъмурий жавобгарлик тўғрисидаги кодекснинг 223-моддасига асосан Ўзбекистон фуқаросининг паспортсиз ёки идентификацияловчи ID-картасиз ёхуд ҳақиқий бўлмаган паспорт билан яшаши маъмурий жавобгарликни келтириб чиқаришини эслатиб ўтган.

Ўзбекистонда фуқароларга ID-карта бериш 2021 йил январдан бошланганди.

2022 йилнинг 31 декабригача ID-карталар 16 ёшга тўлган шахсларга, шунингдек, паспорт йўқолган тақдирда, исм, шариф, фамилия, миллатни ўзгартириш истаги туғилганда ва бошқа сабаблар асосида ихтиёрий тартибда берилади. 2023 йилнинг 1 январидан 2030 йилнинг 31 декабригача биометрик паспортларни ID-карталарга алмаштириш уларнинг муддати тугаши билан мажбурий тартибда амалга оширилади.

ID-карта олиш учун фақат паспорт, ариза ва базавий ҳисоблаш миқдорининг 89 фоизи миқдорида давлат божини тўлаш керак. Бошқа ҳеч қандай махсус ҳужжат талаб қилинмайди.