Forbes 2022 йилнинг энг кўп даромад олган марҳум машҳурлари рейтингини тузди. Унда «Узуклар ҳукмдори» муаллифи, британиялик ёзувчи Жон Толкиен биринчи ўринни эгаллади.
Рўйхат 2021 йил ноябридан 2022 йил октябригача бўлган даврда мероси энг кўп даромад келтирган 13 нафар марҳум дунё юлдузларидан иборат. Гап сотувлар, стриминг платформаларида мусиқалар тингланиши, лицензия битимлари тузилишидан тушган даромад ҳақида бормоқда.
1973 йилда вафот этган Жон Толкиен ўтган бир йил ичида 500 миллион доллар «ишлаб топган».
Иккинчи ўринда 2020 йилда автоҳалокат оқибатида оламдан ўтган америкалик баскетболчи Коби Брайант жойлашди. Бир йилда у 400 миллион доллар даромад олган.
Учинчи ўринни британиялик мусиқачи ва актёр Дэвид Боуи эгаллади, унинг бойлиги бир йилда 250 миллион долларга кўпайган.
Энг бой марҳум машҳурлар бешлигига мусиқачилар Элвис Пресли ва Жеймс Браун якун ясади, улар тегишли равишда 110 ва 100 миллион долларга бойиган.
Шунингдек, рейтингга хонанда Майкл Жексон (75 миллион доллар, 6-ўрин), ёзувчи Доктор Сьюз (32 миллион доллар, 8-ўрин), мусиқачи Жон Леннон (16 миллион доллар, 12-ўрин) ва бошқалар киритилди.
Изоҳ (0)