Uzbekistan Airways 30 октябрдан бошлаб куз-қиш мавсумига ўтади. Мавсумга ўтиш, шунингдек, дунёнинг бир қатор мамлакатларида маҳаллий вақтни қишга ўтказилишини англатади. Шу муносабат билан парвозлар янги жадвалга мувофиқ амалга оширилади.
Қайд этилишича, келаётган қишда маршрут тармоғидаги парвозларнинг аксарияти Тошкентдан амалга оширилади.
Тошкент шаҳридан Дубайга (ҳафтасига 7 марта), Истанбулга Ўзбекистон пойтахтидан (ҳафтасига 16 марта), Самарқанддан (ҳафтасига 4 марта), Фарғонадан (3 та), Бухоро ва Урганчдан – ҳафтасига 2 маротаба мунтазам амалга оширилади. Талаб энг юқори бўлган Тошкент–Москва йўналишидаги қатновлар сони ҳафтасига 30 тагача кўпайтирилган.
Шунингдек, Uzbekistan Airways Express авиақатновлари билан Ўзбекистоннинг деярли барча шаҳарларидан Россиянинг 11 шаҳрига: Москва, Самара, Перм, Омск, Красноярск, Сочи, Екатеринбург, Уфа, Қозон, Минералние води, Иркуцкка парвоз қилиш имконияти мавжуд.
Олмаота, Душанбе, Бишкекка парвозлар ҳам мунтазам равишда амалга оширилади. Тошкент–Сеул парвозларига ҳам талаб кам эмас, ушбу йўналиш бўйича қишки жадвалга ҳафтасига 7 та қатнов киритилган. Бундан ташқари, парвозлар Лондонга (ҳафтасига 2 марта), Франкфуртга (ҳафтасига 3 марта), Ригага (ҳафтасига 2 марта) ва энг узоқ парвоз – Нью-Йоркка ҳафтасига уч маротаба амалга оширилади.
Uzbekistan Airways қиш мавсумининг биринчи куни – 30 октябрдан бошлаб Фарғона–Дубай–Фарғона йўналишида ҳафтасига икки марта парвозларни бошлайди ва 31 октябрдан Тошкентдан Шаржага парвозлар ҳафтасига уч марта оширилади.
Тошкент–Куала-Лумпур–Тошкент йўналиши ҳам 1 ноябрдан бошланади. Авиакомпания, шунингдек, қиш мавсумидан Таиландга парвозларни қайта йўлга қўйишни режалаштирмоқда. Ички туризмни ривожлантириш мақсадида Uzbekistan Airways Самарқанд, Хоразм вилоятини Фарғона водийси билан боғлайдиган республика ичидаги қатновларни кўпайтириш ниятида.
Изоҳ (0)