Тошкент метрополитенида сумкасида бомба борлигини маълум қилган 19 ёшли қиз ушлангани ҳақида хабар берилганди. «Gazeta.uz»нинг ёзишича, қиз 5 суткага қамалди.
Метрополитенда хавфсизликни таъминлаш бошқармаси бошлиғи ўринбосари, подполковник Ҳасан Ҳайдаровнинг нашрга маълум қилишича, шаҳар Жиноят ишлари бўйича Шайхонтоҳур туман судининг қарори билан Н.С. Маъмурий жавобгарлик тўғрисидаги кодекснинг 183-моддаси (майда безорилик) ва 199-моддаси (махсус хизматларни қасддан алдаб чақириш) билан айбли деб топилиб, унга нисбатан 5 сутка маъмурий қамоқ жазоси ҳамда БҲМнинг 1 баробари миқдорида жарима жазоси тайинланди.
Ўзи нима бўлганди?
Тошкент метрополитенининг «Алишер Навоий» бекатида 22 октябрь куни 19 ёшли қиз сумкасини текширтираётган пайтда унинг ичида бомба борлигини маълум қилган.
2003 йилда туғилган қиз автоматик ўтказиш пунктида ўз хизмат вазифаларини бажараётган ходим томонидан тўхтатилган. Н.С. исмли қиздан Метрополитенда хавфсизликни таъминлаш бошқармаси ходими сумкани кўрсатишни сўраганида қиз сумкасида бомба борлигини айтган.
Кўрсатмага кўра, ходимлар зудлик билан яқин атрофдаги ҳудудни ўраб олган ва воқеа ҳақида навбатчилик бўлимига хабар берилган. Шундан сўнг воқеа жойига Ички ишлар вазирлиги Махсус операцияларни мувофиқлаштириш бошқармаси гуруҳи етиб келган. Қиз ҳам вақтинча ҳибсга олинган.
Сумкани кўздан кечириш чоғида ундан портловчи мослама топилмаган. Шундан сўнг далолатнома тузилган. Ходим қиздан нима учун сумкасида бомба борлигини айтганини сўраганида Н.С. унинг кайфияти яхши бўлгани ва шу тарзда ҳазил қилишга қарор қилганини айтган. Қиз пойтахтнинг Шайхонтоҳур тумани 3-ички ишлар бўлимига олиб кетилган.
Фаоллар нима дейди?
Журналист Азиза Қурбонова воқеа юзасидан «5 сутка…?!» сарлавҳали пост қолдирди ва ўзи билан боғлиқ ҳикоя билан ўртоқлашди.
7-синфдан 11-синфгача Чилонзор бекатидан то Буюк ипак йўлигача ҳар куни икки маҳал метрода қатнаганман. Кейин факультет ва ТВ ўртасида ҳам борди-келдим метро орқали бўлган. Бу 2000-2008 йиллардаги гап; у пайтда метрода, вагонларда — ҳамма ерда ҳозиргидек рекламалару ялтир-юлтурлар эмас, «Огоҳ бўлинг, огоҳ бўлинг» деган хавотирли ёзувлар ёпиштирилган бўларди.Ўзимиз ҳам метрони қандайдир ўта муҳим объектлигини ҳис қилардик ва ҳар куни «попкангни оч, сумкангни кўрсат» деган гап-сўзни кутмай, тугунимизни очиб кўрсатардик.
Аллақайси йили, каттароқ синфда ўқиб юрганимда текшир-текширдан зерикиб кетибманми, ҳар куни юзи таниш бўлиб кетган милиционер амакига ҳазиллашибман: «шу кичкина сумкамнинг нимасини кўрасизлар, бомба олиб юрармидим, турникет қилиб қўйса бўлмайдими?»
Милиционер амакининг қошлари чимирилиб, «қани, бомба деганинг учун ҳам сумкани оч» деб, китобларимни варақлаганча яхшилаб текширишни бошлаган. Ҳатто кундалигимни очиб, кимлигим ва баҳоларимни кўрган ва кейин индамай… ўтказиб юборган… Ўшанда роса қўрққанман ва кейинги сафар ортиқча гапирмай, индамай сумкани очиб кўрсатишда давом этганман.
Ҳатто ўша бутун мамлакатда «Огоҳ бўлинг!» шарпалари кезиб юрганда, тинчлик энг катта неъмат эканлиги уқтирилган замонда ҳам мени ҳеч ким 5 суткага қамамаган эди…
Бу ерда эса 19 ёшли қиз кайфияти яхшилиги учун ҳазиллашган экан… 5 сутка қамоқ ва 1 БҲМ жарима беришибди.
Очиғи, нимадир дейишга ҳайронман. Албатта, хавфсизлик жиддий масала. Балки ҳазиллашувчилар кўпайиб кетмаслиги учун ибрат кўрсатмоқчи бўлишгандир. Ким билсин. Қандайдир шу ерда «жазо қонуний бўлиши мумкин, лекин адолатли бўлмаслиги мумкин» деган гапни хулоса қилгим келди, — деб ёзади журналист.
Изоҳ (0)