Сирдарёдаги портлашдан зарар кўрган турар ва нотураржой биноларга 10 минг квадрат ойна ва 4,5 минг листдан ортиқ шифер етказиб берилди.
Вилоят ҳокимлиги матбуот хизмати хабарига кўра, ўтган бир сутка давомида зиён етган биноларнинг ярмидан ортиғи тўлиқ таъмирланди.
Ҳозирга қадар барча 10 та маҳалладаги хонадонларга ва 38 та ижтимоий объектларга 10 минг квадрат ойна ва 4,5 минг листдан ортиқ шифер етказилди.
Мудофаа вазирлигининг билдиришича, айни вақтда ҳудудга жалб этилган ҳарбий хизматчилар томонидан ҳарбий қисм атрофидаги айрим маҳаллаларнинг шикаст етган хонадонлари кўздан кечирилиб, уй эгаларига ёрдам кўрсатиляпти.
Хонадонларнинг ойналари янгиланмоқда, том қисмига зарар етган объектлар таъмирланяпти. Ҳосил бўлган чиқиндилар тўлиқ тозаланяпти. Ҳарбий қисм ҳудудида жойлашган ҳарбий шаҳарчада ҳам айрим хонадонларнинг синган ойналари ва эшиклари таъмирланмоқда.
22 октябрь куни соат 04:55 да Сирдарё вилояти Малик аҳоли пунктидаги Мудофаа вазирлиги омборида якка тартибда портлаш содир бўлганди. Ушбу ҳодиса оқибатида жароҳат олган 16 нафар беморнинг 12 нафари Сирдарё тумани тиббиёт бирлашмасига олиб келинган. Барча жароҳат олганларга зудлик билан биринчи ёрдам кўрсатилган. Ҳисоб-китобларга кўра, 3742 та турар ва нотурар жойнинг томи, шифти, дераза ва эшик ромларига қисман талафот етган.
Изоҳ (0)