Samarqandda 1600 dollar evaziga jarima maydonchasidagi mashinani chiqarib berishni aytgan shaxs ushlandi. Bu haqda viloyat ichki ishlar boshqarmasi xabar bermoqda.

Qayd etilishicha, 20-oktabr kuni IIV SHXBB Samarqand viloyati bo‘yicha boshqarmasiga fuqaro ariza bilan murojaat qilgan. Unda 16-oktabr kuni spirtli ichimlik iste’mol qilib, o‘ziga tegishli bo‘lgan Nexia-3 avtomashinasini boshqarib borayotganida YPX inspektorlari uni alkotesterdan o‘tkazgani, spirtli ichimlik iste’mol qilgani aniqlanganini bildirgan.

Shu sababli unga nisbatan ma’muriy bayonnoma rasmiylashtirilib, avtomashinasi jarima maydonchasiga qo‘yilganini ma’lum qilga. Shundan so‘ng u avtomashinani jarima maydonchasidan chiqarishga harakat qilib yurganida “B” ismli shaxs ushbu ishni hal qilishda yordam berishi aytgan. U bilan gaplashganida Samarqand viloyati IIB YHXBda ishlovchi tanishlari orqali unga nisbatan chora ko‘rilmaslik, ishini ijobiy hal qilib berishi mumkinligini, ya’ni unga nisbatan tuzilgan ma’muriy bayonnomani sudga yubormasdan haydovchilik guvohnomasini olib berib, transport vositasini jarima maydonchasidan chiqarib berishini aytib, 1600 dollar berishni talab qilib kelayotganini, ushbu fuqaroga nisbatan qonuniy chora ko‘rishni so‘ragan.

Mazkur ariza yuzasidan 20-oktabr kuni IIV SHXBB Samarqand viloyati bo‘yicha boshqarmasi tezkor xodimlari tomonidan o‘tkazilgan tezkor tadbir davomida fuqaro Q.B. ariza muallifidan 1600 dollar miqdoridagi pullarni olgan vaqtida ushlanib, hujjatlashtirilgan.

Mazkur holat yuzasidan Samarqand viloyati IIB huzuridagi tergov boshqarmasi tomonidan tergovga qadar tekshiruv harakatlari olib borilmoqda.