Португалия терма жамоаси ҳамда Саудия Арабистонининг “Ан-Насср” клуби ҳужумчиси Криштиану Роналду 2025 йилги “Олтин тўп” мукофотини ким қўлга киритиши мумкинлиги ҳақидаги саволга жавоб берди. Бу ҳақда Championat нашри хабар бермоқда.
40 ёшли форвард ушбу мукофотга нисбатан танқидий муносабат билдирди:
Бу йилги “Олтин тўп” совринини ким қўлга киритади? Менимча, бу сохта мукофот, — дея Роналдунинг сўзларини келтиради Al Nassr Zone.
Эслатиб ўтамиз, “Олтин тўп” мукофотининг амалдаги ғолиби “Манчестер Сити” ярим ҳимоячиси Родри ҳисобланади. Ўтган мавсум кўплаб мутахассислар ушбу совринни “Реал” ҳужумчиси Винисиус қўлга кирицҳини тахмин қилган эди, бироқ амалда испаниялик футболчи ғолиб бўлди.
Ушбу мавсум мукофот учун асосий даъвогар “ПСЖ” ҳужумчиси Усмон Дембеле ҳисобланади. Франциялик футболчи якунига етган мавсум жамоаси билан мамлакат чемпионлиги, кубоги ва Суперкубогини қўлга киритди. Шунингдек, “ПСЖ” билан УЕФА Чемпионлар Лигасида ҳам зафар қучди.
Маълумот учун, Криштиану Роналду фаолияти давомида беш марта “Олтин тўп”ни қўлга киритган. Бу борада ундан фақат Аргентина терма жамоаси ва “Интер Майами” клуби ҳужумчиси Лионель Месси кўпроқ ғолибликка эришган — 8 марта.
- Роналду 2023 йил январидан буён “Ан-Насср” сафида тўп сурмоқда.
- Унинг клуб билан амалдаги шартномаси 2027 йил ёзига қадар мўлжалланган.
- Transfermarkt портали португалиялик ҳужумчининг қиймати 12 миллион еврога баҳоланмоқда.
Изоҳ (0)