Бош прокуратура ҳузуридаги Иқтисодий жиноятларга қарши курашиш департаментининг маъмурий биносини таъмирлаган қурувчилар иш ҳақини ололмай сарсон бўлмоқда. Бу ҳақда «Дарё»га мурожаат қилган қурувчилар масъуллар уларни олти ойдан бери овора қилиб, иш ҳақини бермаётганини айтмоқда.
Мазкур бино таъмирида 7 нафар ишчиси билан иштирок этган қурувчи Жамол Кенжаев таъмирлаш ишларида 2021 йилнинг сентябрь ойидан 2022 йилнинг апрель ойига қадар иштирок этишганини, шу пайтга қадар меҳнати учун жами ҳисобда 50 миллион сўм олишганини, яна 80 миллион сўм иш ҳақи қолиб кетганини айтмоқда.Бино таъмирига қурувчи сифатида жалб қилиниб, 7 нафар ишчимиз билан бирга ишладик. Таъмирлаш ишларида 2021 йилнинг сентябрь ойидан 2022 йилнинг апрель ойигача иштирок этиб, етти киши 50 миллион сўм пул олганмиз. Яна 80 миллион иш ҳақимиз қолиб кетган. Аммо ололмаяпмиз. Бизни ишга жалб қилган қурувчига мурожаат қилсак, бизнинг буюртмачимиз қамалиб кетди дейди. Департаментга мурожаат қилсак, ишга жалб қилган қурувчингга бор дейди. Хуллас, ўртада биз сарсон бўляпмиз, — дейди қурилиш ишларида қатнашган мурожаатчи Жамол Кенжаев.
Жамол Кенжаев қурилишда қатнашган шериклари меҳнат ҳақини ундан талаб қилаётганини, у эса икки ўт орасида қолганини билдирмоқда.
Энг ёмони мен билан бирга бу ерга ишлашга келган 7 нафар шеригим мени билади ва пулни мендан сўраяпти. Мен эса Жасур акадан талаб қиляпман. Жасур ака департамент бошлиғи пул бераман деганини, аммо ҳалигача бермаганини айтиб, баҳона қиляпти, — дейди мурожаатчи.Меҳнат қилиб пулини ололмаётганлардан яна бири Мирзоҳид Йўлдошев ҳам 80-100 миллион сўм иш ҳақига куйиб қолаётганини айтмоқда.
Оддий қурувчи сифатида меҳнат қилиб, 50 миллион сўм иш ҳақимизни олганмиз, аммо 80-100 миллион сўмга яқин пулимиз қолиб кетган. Сарсон қилишмоқда. Шу бинода ўтирганлар бизга қулоқ солмай меҳнат ҳақимизни еб кетишмоқда, — дейди у.Қора меҳнат қилиб иш ҳақини ололмаётганларнинг яна бири Зуҳриддин Менглиев 7 ойлик меҳнати давомида 30 миллион сўм пул олганини, айни кунда эса камида 100 миллион сўм маблағи берилмаётганини айтмоқда.
У ёққа бор, бу ёққа бор деб, бир йилдан бери сарсон қилишяпти. Айни кунда бу бино таъмиридаги меҳнатимиз эвазига 100 миллион сўм пул олишимиз керак. Аммо беришмаяпти, — дейди Зуҳриддинг Менглиев.
Пулини ололмаётган ишчиларни ишга жалб қилган қурувчи Жасур Намозовнинг «Дарё»га билдиришича, у департамент биноси таъмирини бошлашдан аввал Бош прокуратура ҳузуридаги Иқтисодий жиноятларга қарши курашиш департаменти бошлиғи Дилшод Раҳимов билан шахсан кўришган.
Ишни бошлашдан аввал Рустам ака билан гаплашиб, департамент бошлиғи Дилшод аканинг олдига кирганмиз. Дилшод аканинг ўзи бу департамент биноси эканини, шу сабаб бошқаларга нисбатан арзонроқ қилиб, таъмирлаб беришимизни сўради. Бошқа усталар кв/метрини 18 доллардан қилаётган бўлса, мен Дилшод аканинг илтимосига кўра 16,5 долларга туширдим. Қолаверса, Дилшод ака агар фирма орқали пул тўланса солиқлари билан кўпайиб кетишини айтиб, нақд пул беришини билдирди. Шу келишувга кўра, мен бу бинода 800 миллион сўмлик ишни бажардим. Салкам 40 кишини олиб келиб ишлатдим. Энди эса 600 миллион сўмга яқин пулимизни ололмай сарсонмиз. Мени нафақат ишчилардан, қурилиш материаллари сотувчи танишларимдан ҳам қарзим бор. Аммо эндиликда Дилшод аканинг олдига олиб киришмаяпти. Атайлаб учраштиришмаяпти, — дейди Жасур Намозов.Жасур Намозовнинг маълумот беришича, у бошчилигидаги қурувчилар бинонинг ташқи фасад қисмини таъмирлаган.
Бизни департамент ходими Рустам Сафаров бу ерга олиб келган. Рустам ака орқали Дилшод Раҳимов билан кўришдик ва айнан департамент бошлиғининг пулингни тийин-тийинигача бераман деган ваъдасини олганмиз. Биз бинонинг ташқи фасад қисмини ва деворларини таъмирлаб, 800 миллион сўмлик ишни амалга оширганмиз. Шундан 200 миллиондан ортиғи берилган бўлса, 600 миллион сўмга яқин пулимизни ололмаяпмиз, — дейди у.Жасур аканинг айтишича, айни кунда Рустам Сафаров уни департамент бошлиғи билан учраштирмасликка уринмоқда.
«Дарё» журналисти иш ҳақини ололмаётган ишчилар мурожаатига кўра, Бош прокуратура ҳузуридаги департаментда бўлиб, масъуллар билан суҳбатлашишга уринди.
Дастлаб, журналист билан камераларсиз гаплашишни лозим топган департамент масъуллари ва ахборот хизмати ходими Дилрабо Курязова аниқ саволларга жавоб беришдан тийилиб, олди-қочди гаплар билан чалғитишга уринди. Шу маълумотларини микрафон ва камера қаршисида гапиришларини илтимос қилганимизда эса «бизда мумкинмас», дейишдан нарига ўтмади. Шундан сўнг «Дарё» жамоаси Бош прокуратура ахборот хизмати раҳбарига мурожаат қилиб, департамент масъулларидан ахборот олиб бўлмаётганини, бу борада кўмак беришларини илтимос қилди.
Шундан сўнг «тилга кирган» департамент ахборот хизмати «Дарё» нашрининг пулини ололмаётганини айтаётган қурувчилар ҳақиқатдан ҳам шу бино таъмирида иштирок этганми? Агар улар шу бино таъмирида иштирок этган бўлса, уларнинг 600 миллион сўмлик иш ҳақини ололмаётгани ҳақидаги, шунингдек қурувчилар масъули Жасур Намозовнинг департамент бошлиғи Дилшод Раҳимов билан кўришганию, масъул солиқлардан қочиш учун қурувчига нақд шаклда пул тўлаб бермоқчи бўлгани ҳақидаги иддаолари қанчалик ҳақиқат экани борасидаги саволларини очиқ қолдирди.
Бош прокуратура ҳузуридаги Иқтисодий жиноятларга қарши курашиш департаментининг маъмурий биносини реконструкция қилиш учун Тошкент шаҳар ҳокими қарори чиққан. Қарорга асосан ҳокимлик қошидаги «Ягона буюртмачи хизмати инжиниринг компанияси» давлат унитар корхонаси билан шартнома тузилган. Шартномага кўра, ДУК томонидан қонунчиликда белгиланган тартибда тендер ўтказилиб, «Саддинисо Ҳабибулло» хусусий корхонаси ғолиб деб топилган. Айни кунда қурилиш ишлари битмаган. Бироқ «Ягона буюртмачи хизмати инжиниринг компанияси» давлат унитар корхонаси сўровига кўра, барча тўловлар тўлиқ амалга оширилган ва қарздорлик мавжуд эмас, — дейди департаментнинг Жамоатчилик билан алоқалар ва ҳуқуқий ахборот бўлими бош инспектори Дилрабо Курязова.«Дарё» нашри «Саддинисо Ҳабибулло» хусусий корхонаси масъуллари билан ҳам гаплашишга уринди. Ўзини Алишер деб таништирган хусусий корхона ишчиси айни пайтда бошлиғи қамоқда эканини, шу сабаб бу масалада бошқа маълумот беролмаслигини, бироқ департамент биносини таъмирлаш ишлари учун тўлаб берилиши лозим бўлган пуллар тўланмаганини, шу сабаб улар қурувчиларга пул беролмаётганини билдирди.
Биз пешона теримиз ҳақини сўраяпмиз. Бу бинода ишлайман деб келганлар оиласи учун, бола-чақасини боқиш учун Тошкентга келиб ишлаган. Улар ана шу ҳақини сўраяпди, — дейди Жасур Намозов.Қизиқ, бино таъмири тугаган, департамент масъуллари ва амалдорлар бинода фаолият юритмоқда. Шунингдек, қурилиш ишлари тугалланмаса-да, бино таъмири учун сўралган барча маблағлар Тошкент шаҳар ҳокимлиги ҳузуридаги «Ягона буюртмачи хизмати инжиниринг компанияси»га ўтказиб берилгани айтилмоқда. Қурувчилар эса бу пулни кўрмаганмиз ва ҳалигача ололмаяпмиз демоқда. Хўш, қурувчиларнинг пули қаерда эканига аниқлик киритувчи масъул борми?
«Дарё» воқеалар ривожини кузатишда давом этади.
Изоҳ (0)