Туркиянинг Бартин вилояти Амасра туманидаги кўмир конида юз берган портлаш оқибатида қурбон бўлганлар сони 40 кишига етди, деб ёзади Anadolu Agency. Сўнгги маълумотларни Туркия ички ишлар вазири Сулаймон Сойлу жамоатчилик билан бўлишди.
Авария вақтида конда бўлган 110 кишининг 58 нафари қутқариб олинган. Бир кончининг тақдири номаълум бўлиб қолмоқда.
Сойлунинг айтишича, қидирув ишлари давом этмоқда.
Амасра туманидаги конлардан бирида портлаш 14 октябрь, жума куни маҳаллий вақт билан 18:15 атрофида юз берган.
Туркия соғлиқни сақлаш вазири Фахриддин Хожа аввалроқ маълум қилганидек, 11 киши касалхонага жойлаштирилган.
Туркия президенти Ражаб Тоййиб Эрдўғон 15 октябрь, шанба кунига белгиланган барча тадбирларни бекор қилди ва тез орада воқеа жойига етиб боришини эълон қилди.
Бартин вилояти прокуратураси кондаги портлаш юзасидан жиноят иши очди.
Аввалроқ кон портлаши оқибатида 28 киши ҳалок бўлгани хабар берилганди.
Туркия конларидаги энг йирик портлашлардан бири 2014 йил майида Маниса вилоятида содир бўлган, ўшанда 270 дан ортиқ одам ҳалок бўлганди.
2017 йилда эса Туркиянинг Ширнак вилоятидаги кўмир конида юз берган портлаш оқибатида олти кончи ҳалок бўлган.
Мавзуга доир: Туркиядаги полиция биносида теракт содир этилди (видео)
Изоҳ (0)