Айни кунларда хонанда Нилуфар Усмонова илк яккахон концерт дастурига тайёргарлик кўряпти. Хонанданинг таклифига кўра, «Дарё» мухбирлари концертнинг тайёргарлик жараёнида иштирок этишди.
Хонанда Нилуфар Усмонова катта саҳнага қадам қўйганига 27 йил бўлган. Ёдингизда бўлса, у онаси Юлдуз Усмонованинг 1995 йили ўтказилган концерт дастурида «Шайтонга бўйсунмас юраклар» номли дуэти билан иштирок этганди. Яккахон ижодини бошлаганига эса бу йил 15 йил тўлади.
Аммо хонанда шу кунгача бирор марта яккахон концерт дастурини ўтказмаган. Баъзи мухлисларнинг фикрича, бунинг сабаби хонандага қўйилган тақиқлар билан боғлиқ экан.
— Концерт беришимга ҳеч қачон тақиқ бўлмаган. Тан оламан, у пайтлари ёш бўлганман, ўйин-кулгига ўч бўлганман. Бундан ташқари, фарзандларимнинг кетма-кет туғилиши сабаб концерт беришга ўзимда куч тополмаганман. Ижодкор концерт бериш учун руҳан тайёр бўлиши керак. Шу йил концерт бериш насиб қилган экан, — дейди хонанда Нилуфар Усмонова.
«Кел иккимиз» деб номланган концерт дастури қўшиқлар фонограмма орқали ижро этилади, аммо бир нечта қўшиқларни жонли ижро этишни режалаштирган.
— Жонли концерт беришга бироз вақтимиз озлик қилди. Яъни созандалар билан тўлиқ тайёргарлик кўролмадим. Аввалига 7 та қўшиқни тайёрлагандик, бугун улар сони 11 тага етди. Жонли концерт бериш фақатгина хонандага боғлиқ эмас, бунга созандалар ҳам тайёр бўлиши керак, — дейди хонанда Нилуфар Усмонова.
Концерт дастурининг рақсларини Юлдуз Усмонованинг балетместери Зарина Аҳмедова саҳналаштирмоқда.— Нилуфар билан ишлаш қийин эмас, рақсларни тезда илиб олади. Концертдаги рақслар нафақат замонавий, балки миллий руҳ уйғунлигида бўлади. Театрлашган рақс томошалари ҳам бор, — дейди Зарина Аҳмедова.
Нилуфар Усмонова шу кунгача кўплаб хонандалар билан дуэт куйлаган. Хўш, унинг қайси дуэтдоши концертда иштирок этади? Бу саволга концерт муҳаррири Лола Собирова қуйидагича жавоб берди.— Ҳозирча бу сирни ошкор этолмаймиз. Мухлисларни қизиқтирадиган интригалар бўлиши керак, — дейди Лола Собирова.
Кўпчилик мухлисларни қизиқтираётган яна бир савол хонанданинг онаси Юлдуз Усмонованинг концертда иштирок этиши билан боғлиқ.— Онам албатта, концертга келади. Фақат оддий томошабин сифатида залдан мени кузатади. Қаерда ўтириши ҳам менга номаълум, — дейди Нилуфар Усмонова.
Бундан билиш мумкинки, хонанда онаси билан дуэт куйлашни режа қилмаяпти.
Хонанда Умидахоннинг турмуш ўртоғи Нилуфар Усмонованинг иш юритувчиси ҳисобланади. У тўйхоналарда Нилуфар Усмоновга ўзгача иззат кўрсатаётганини кўрган баъзи мухлислар «Умидахон, рашк қилмайсизми?» деб изоҳлар қолдиришади. Концерт арафасида ҳамкасбини қўллаб-қувватлаш учун келган Умидахондан мухлисларни қизиқтирган шу саволга жавоб олишга қарор қилдик.
— Нилуфар Усмоновага опамдек азиз, мен у кишининг келини ҳисобланаман. Одамларнинг гап-сўзлари асоссиз. Чунки санъат вакили ҳамиша баланд пошнали туфлида юришини ва узун кўйлак кийишини яхши биламан. Бундай кийимда оёғи тойиб кетиши ҳеч гап эмас. Яқинда ўзимда ҳам худди шунга ўхшаш вазият бўлди. Нилуфар опамга ҳам, турмуш ўртоғимга ҳам ишонаман. Уларнинг аҳил жамоасига ҳавас қиламан. Менга ҳам концерт бериш насиб қилсин. Фақат ҳавас қиляпман, — дейди хонанда Умидахон.
— «Халқлар дўстлиги» санъат саройидаги концерт дастуридан сўнг вилоят ва чекка ҳудудларга бориб, концерт беришни ва халқ хизматида бўлишни истаяпман. Ўзи инсон концерт беришга руҳан тайёр бўлганидан кейин халқ билан янада яқин бўлишни истар экан, — дейди Нилуфар Усмонова.
Концертнинг тайёргарлик жараёнидан тайёрланган репортажни қуйида томоша қилишингиз мумкин.
Мавзуга доир:
Изоҳ (0)