“Menejerlar otib tashlangan taqdirda ham, omillar mavjud bo‘lsa, narx oshaveradi”. Iqtisodchi Abdulla Abduqodirov Lukashenkoning narxlarni oshirishni taqiqlaganiga munosabat bildirdi

Belarus prezidenti Aleksandr Lukashenko 6-oktabrdan boshlab mamlakatda narxlarni oshirishni taqiqlashni buyurgandi. Iqtisodchi Abdulla Abduqodirov prezidentning ushbu qarori yuzasidan o‘z mulohazalarini “Daryo”ga taqdim etdi.

Odatiy populizm. Narxlar bir necha hafta davomida o‘zgarmay turishi mumkin, keyin esa keskin oshadi. Hech qanday nazorat mexanizmi va itoatsizlikni jazolaydigan qonunlar yo‘q. Kapitalizm tarixida hech qachon boshqaruvchi narxlarning ko‘tarilishini to‘xtatishni buyurgan va bozor unga quloq solgan holat bo‘lmagan.

Bozor ishtirokchilari nafaqat davlat korxonalari, balki xususiy korxonalar, jumladan, xorijiy korxonalar hamdir. Agar narx o‘sishi omillari mavjud bo‘lsa, menejerlar otib tashlangan taqdirda ham, ular o‘sishda davom etaveradi, — deydi iqtisodchi.

Ma’lumot uchun, Lukashenko narxlarni oshirmaslik qarori bugunning o‘zidayoq kuchga kirishini bildirib, bunga izoh bergandi.

Ertadan emas, aynan bugundan. Ertagacha ba’zi chayqovchilar narxlarni oshirib olishga ulgurmasligi uchun bugundan narxlarni oshirish taqiqlanadi, deb topshiriq berdim, — degandi prezident.

Mavzuga doir: Ekspert Abdulla Abduqodirov Rossiya fond birjasining qulashiga munosabat bildirdi