Фарғона вилояти Қўқон шаҳрида жиноят ишини ижобий ҳал қилиб бериш эвазига фуқародан 10 минг долларни пора тариқасида қўлга киритмоқчи бўлган шахслар ушланди. Бу ҳақда вилоят ички ишлар бошқармаси ахборот хизмати хабар берди.
Маълум қилинишича, 5 октябрь куни фуқаро Д.Қ. (муқаддам судланган) ҳамда М.Ж. олдиндан тил бириктириб, фуқаро Д.Э.нинг тергов органи томонидан айбланиб, қамоққа олинган таниши Т.Р.ни ҳуқуқни муҳофаза қилувчи органларда ишловчи мансабдор шахслар орқали қамоқдан чиқариб, жиноят ишини ижобий ҳал қилиб беришлари эвазига ундан 10 минг доллар талаб қилган.
Фуқаронинг аризаси асосида ҳуқуқ-тартибот органлари томонидан ҳамкорликда ўтказилган тезкор тадбир давомида юқоридаги шахслар Қўқон шаҳри Туркистон кўчасида аризачидан 10 минг доллар олган вақтда ашёвий далиллар билан ушланган.
Мазкур ҳолат юзасидан Д.Қ. ва М.Ж.га нисбатан Жиноят кодексининг 25, 168-моддаси 3-қисми «а» банди ва 28, 211-моддаси 2-қисми «б» банди билан жиноят иши қўзғатилиб, қамоққа олиш тарзидаги эҳтиёт чораси қўлланди.
Шунингдек, муқаддам судланган фуқаро Д.Қ. 3 нафар фуқародан жарима майдонидаги автомашинани чиқариш, ҳайдовчилик гувоҳномаси олиб бериш ва бошқа ҳаракатлар учун ҳам пул олгани юзасидан аризалар келиб тушган. Ҳозирда тергов ҳаракатлари олиб борилмоқда.
Изоҳ (0)