Farg‘ona viloyati Qo‘qon shahrida jinoyat ishini ijobiy hal qilib berish evaziga fuqarodan 10 ming dollarni pora tariqasida qo‘lga kiritmoqchi bo‘lgan shaxslar ushlandi. Bu haqda viloyat ichki ishlar boshqarmasi axborot xizmati xabar berdi.
Ma’lum qilinishicha, 5-oktabr kuni fuqaro D.Q. (muqaddam sudlangan) hamda M.J. oldindan til biriktirib, fuqaro D.E.ning tergov organi tomonidan ayblanib, qamoqqa olingan tanishi T.R.ni huquqni muhofaza qiluvchi organlarda ishlovchi mansabdor shaxslar orqali qamoqdan chiqarib, jinoyat ishini ijobiy hal qilib berishlari evaziga undan 10 ming dollar talab qilgan.
Fuqaroning arizasi asosida huquq-tartibot organlari tomonidan hamkorlikda o‘tkazilgan tezkor tadbir davomida yuqoridagi shaxslar Qo‘qon shahri Turkiston ko‘chasida arizachidan 10 ming dollar olgan vaqtda ashyoviy dalillar bilan ushlangan.
Mazkur holat yuzasidan D.Q. va M.J.ga nisbatan Jinoyat kodeksining 25, 168-moddasi 3-qismi “a” bandi va 28, 211-moddasi 2-qismi “b” bandi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llandi.
Shuningdek, muqaddam sudlangan fuqaro D.Q. 3 nafar fuqarodan jarima maydonidagi avtomashinani chiqarish, haydovchilik guvohnomasi olib berish va boshqa harakatlar uchun ham pul olgani yuzasidan arizalar kelib tushgan. Hozirda tergov harakatlari olib borilmoqda.
Izoh (0)