Украина ҳарбийлари Россия қўшинлари томонидан эгаллаб олинган Херсон вилоятида яна саккизта аҳоли пунктини озод қилди. Бу ҳақда Украина президенти Владимир Зеленский урушнинг 223-куни якунларига бағишланган видеомурожаатида айтиб ўтди.
«Любимовка, Крешченовка, Золотая Балка, Беляевка, Украинка, Катта ва Кичик Александровкалар ҳамда Давидов Брод аҳоли пунктлари истилочилар қўлидан озод этилди ва барқарорлаштирилди. Бу ҳали тўлиқ рўйхат эмас. Бизнинг жангчиларимиз тўхтаб қолмаяпти. Истилочини ўз еримиздан қувиб чиқаришимиз — вақт масаласи, холос», — деди президент.
Шу ҳафта Херсон вилоятидан ташқари, Харьков, Луганск ва Донецк вилоятларидаги шаҳар ва қишлоқлар ҳам «Россиянинг сохта референдумидан озод этилди», деди Зеленский. Унинг сўзларига кўра, гап озод қилинган ўнлаб аҳоли пунктлари ҳақида бормоқда.
Шунингдек, президент маълум қилишича, Украина армияси мамлакат жанубида «анча тез ва шиддатли тарзда» олға кетишда давом этмоқда.
4 октябрь куни Украина президенти офиси раҳбари ўринбосари Кирилл Тимошенко Донецк, Луганск, Николаев, Харьков ва Херсон вилоятларида 1534 та аҳоли пункти озод этилиб бўлганини маълум қилди. Ўз навбатида, Украина ички ишлар вазири ўринбосари Евгений Енин Херсон вилоятининг ўзида 50 та аҳоли пункти озод қилинганини айтди.
Шу куни Россия Мудофаа вазирлиги Украинадаги жанговар ҳаракатлар харитасини намойиш қилди, унга кўра, Херсон вилоятида фронт чизиғи тахминан 30 километрга жанубга силжиган.
Изоҳ (0)