Тошкент—Самарқанд тезюрар поезд йўли бўйлаб 629 та арзон уй-жой қурилиши маълум қилинди

Тошкент—Самарқанд тезюрар поездининг Тошкент вилояти ҳудудидан ўтган қисмида 629 та арзон уй-жой қурилади. Бу ҳақда Тошкент вилояти ҳокимлиги ахборот хизмати ташаббуси билан ташкил этилган пресс-турда маълум қилинди, дея хабар берди «Дарё» мухбири.

Вилоят ҳокимлиги ахборот хизмати республикада фаолият юритувчи ОАВ вакиллари ва блогерлар учун ноодатий пресс-тур ташкил этиб, Вазирлар Маҳкамасининг Тошкент—Самарқанд тезюрар темир йўли участкаси бўйлаб жойлашган аҳоли пунктлари архитектура қиёфасини яхшилаш ва бу ерга туташ ҳудудларни ободонлаштириш бўйича чора-тадбирлар тўғрисидаги қарори ижросини таъминлаш борасида қилинаётган ишлар ҳақида маълумот берди.

Таъкидланишича, қарорга кўра Тошкент—Самарқанд тезюрар темир йўли ёқасида жойлашган аҳоли пунктларининг архитектуравий қиёфасини яхшилаш бўйича, Тошкент шаҳри, Тошкент, Сирдарё, Жиззах ва Самарқанд вилоятларидаги участкалар бўйлаб жойлашган ҳудудларда кўплаб ишлар амалга оширилган. Бугунга қадар 3078 та уй реконструкция ва капитал таъмирланиб, уларнинг томлари алмаштирилган. Олд қисмлари таъмирланиб, девор ўрнатилган.

Мазкур мақсадлар учун 33,7 миллиард сўм ажратилди. Бундан ташқари, Тошкент — Самарқанд тез юрар темир йўли участкаси ёқаси бўйлаб намунавий лойиҳалар бўйича 629 та арзон уй-жой қурилиши кўзда тутилган. Улар учун 79,1 миллиард сўм маблағ сарф этилмоқда», — дейди вилоят ҳокимлиги ахборот хизмати ходими Асқар Исмоилов.

Темир йўл бўйлаб жами 12 та ноқонуний турар ва нотурар жойлардан 10 таси бузилиб, 247 та турар жой ва ташкилот биноларининг том қисми таъмирланди, 13 минг 550 метр деворлар қайта таъмирланиб, 19 минг 900 метр деворларга ранг берилди ҳамда 7 минг 523 метр паст деворлар кўтарилди. 697 та бинолар таъмирланиб, 501 тасининг фасад қисмига ранг берилди ҳамда 47 та маҳалладаги 11 минг 450 метр зовур, ариқ ва лотоклартозаланди.

Шунингдек, маҳалла ҳудудларидаги 75 та симёғочлар ҳамда 2 та кўприк бўялиб, таъмирланди. 43 минг 850 та дарахт кўчати экилиб, оқланди. 46 та ҳудудлардаги 46,1 гектар ер майдони кўкаламзорлаштирилди.

Ушбу участкаларда темир йўл атрофига ўрнатилган 2,65 километр панжаралар, хусусан, темир йўл атрофидаги 9,5 километр йўл таъмирланди», — дейди масъул.