Россия Запорожье ва Херсон вилоятлари давлат суверенитети ва мустақиллигини тан олди, тегишли фармонларни мамлакат президенти Владимир Путин имзолади, деб ёзади «РБК». Улар ҳуқуқий ҳужжатлар порталида эълон қилинди.
Қарор «халқаро ҳуқуқнинг умумий тан олинган тамойиллари ва халқаро меъёрларига мувофиқ, БМТ уставида белгиланган халқларнинг тенг ҳуқуқлилиги ва ўз-тақдирини ўзи белгилаш ҳуқуқи тамойилини тан олган ва тасдиқлаган ҳолда» ҳамда референдумда «халқ ўзи билдирган хоҳиш-истаклари»ни ҳисобга олган ҳолда қабул қилинди, дейилади фармонларда.
Эслатиб ўтамиз, 30 сентябрь куни 15:00 да (Тошкент вақти билан 17:00) Кремлда янги ҳудудларнинг Россия таркибига қўшилиши ҳақидаги шартномалар имзоланиши кутилмоқда.
Референдумлар
Россия таркибига кириш ҳақидаги референдумларда овоз бериш 27 сентябрь куни якунланди. 28 сентябрь куни эрталаб Донбасс сайлов комиссиялари овозларнинг 100 фоизи кўриб чиқилганидан кейин референдумлар натижаларини эълон қилди. Уларнинг айтишича, ЛХР сайловчиларининг 98,42 фоизи, ДХР электоратининг 99,23 фоизи, Запорожье ва Херсон вилоятлари босиб олинган ҳудудлари аҳолисининг эса тегишли равишда 93,1 фоизи ва 87,05 фоизи Россия таркибига қўшилишни ёқлаб овоз берган.Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Канада бош вазири референдумлар туфайли Россияга қарши янги санкциялар киритилишини эълон қилди. Зеленский эса референдумлар тан олинса, Путин билан музокаралар ўтказмаслигини айтди.
Изоҳ (0)