Rossiya Zaporojye va Xerson viloyatlari davlat suvereniteti va mustaqilligini tan oldi, tegishli farmonlarni mamlakat prezidenti Vladimir Putin imzoladi, deb yozadi “RBK”. Ular huquqiy hujjatlar portalida e’lon qilindi.
Qaror “xalqaro huquqning umumiy tan olingan tamoyillari va xalqaro me’yorlariga muvofiq, BMT ustavida belgilangan xalqlarning teng huquqliligi va o‘z-taqdirini o‘zi belgilash huquqi tamoyilini tan olgan va tasdiqlagan holda” hamda referendumda “xalq o‘zi bildirgan xohish-istaklari”ni hisobga olgan holda qabul qilindi, deyiladi farmonlarda.
Eslatib o‘tamiz, 30-sentabr kuni 15:00 da (Toshkent vaqti bilan 17:00) Kremlda yangi hududlarning Rossiya tarkibiga qo‘shilishi haqidagi shartnomalar imzolanishi kutilmoqda.
Referendumlar
Rossiya tarkibiga kirish haqidagi referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Kanada bosh vaziri referendumlar tufayli Rossiyaga qarshi yangi sanksiyalar kiritilishini e’lon qildi. Zelenskiy esa referendumlar tan olinsa, Putin bilan muzokaralar o‘tkazmasligini aytdi.
Izoh (0)