АҚШ президенти Жо Байден, келиб тушаётган маълумотларга кўра, Американинг Флорида штатига ёпирилган «Иэн» довули аҳоли орасида катта сонли қурбонларни келтириб чиқариши мумкинлигини қайд этди. Бу ҳақда «Интерфакс» хабар берди.
«Бу Флорида тарихидаги энг кўп ўлим келтирган бўронга айланиши мумкин. Бизда мавжуд рақамлар узил-кесил эмас, лекин келиб тушаётган хабарларга қараганда, қурбонлар сони катта бўлиши мумкин», — деди Байден Фавқулодда вазиятлар бўйича федерал агентлик бош қароргоҳида ўтказилган матбуот анжуманида.
Байден, шунингдек, маҳаллий мансабдорларни қўллаб-қувватлашга ваъда берди, вайронагарчиликларни тозалаш ва жамоат биноларини қайта тиклаш бўйича харажатларнинг барчасини федерал ҳукумат қоплашини айтди.
Ҳукумат уйлари вайрон бўлган ёки зарар кўрган одамларни ҳам қўллаб-қувватлайди.
ABC News телеканали маълумотларига кўра, айни пайтгача «Иэн» довули туфайли Флоридада камида тўққиз киши ҳалок бўлган.
Шарлотт округи комиссари Крис Констанс телеканалга маълум қилишича, ушбу округда олти киши ҳалок бўлган. Шунингдек, Сарасота округида иккита ўлим қайд этилган. Волусия округида эса бир киши ҳалок бўлган.
Флоридада 2,3 миллиондан зиёд истеъмолчи ҳамон электрсиз қолмоқда.
«Иэн» довули Флоридага 28 сентябрь куни ёпирилди, ўшанда унга кучлилик даражаси бўйича тўртинчи тоифа берилган эди. Шамол тезлиги соатига 250 километргача етган.
АҚШ Миллий довуллар маркази маълумотларига қараганда, 29 сентябрь куни кечқурун «Иэн»нинг кучи биринчи тоифагача пасайган, шамолнинг максимал тезлиги соатига 120 километргача етмоқда.
Метеорологлар огоҳлантиришича, «Иэн» Жанубий ва Шимолий Каролина ҳамда Жоржия штатларига қараб ҳаракатланмоқда. Кучли шамол, жала ва ҳаёт учун хавфли бўлган сув тошқинлари кутилмоқда.
Aerial videos of Lee County and the city of Kissimmee, both in Florida, show some of the widespread destruction caused by Hurricane Ian.
— The New York Times (@nytimes) September 29, 2022
Latest storm updates: https://t.co/c4xMkaF9q0 pic.twitter.com/lcDPjPJpIL
Изоҳ (0)